(ប៉ារីស)៖ ព្រឹត្តិការណ៍កីឡាប៉ារ៉ាឡាំពិក Paralympics Games 2024 គិតត្រឹមថ្ងៃទី០៣ ខែកញ្ញានេះ ក្រុមអត្តពិលជនមានពិការភាព ចិន នៅតែបន្តនាំមុនចំនួនមេដាយសរុបកើនដល់ ៨៧គ្រឿង ជាមួយការរកបានមេដាយមាស ៤៣គ្រឿង ខណៈក្រុមអត្តពលិកម្ចាស់បារាំង ឈរនៅលេខរៀងទី៥ រកបានមេដាយមាស ១១គ្រឿងបណ្តោះអាសន្ន ។
ក្រុមអត្តពលិកចក្រភពអង់គ្លេស ពេលនេះមានមេដាយមាស ២៩គ្រឿងឈរលេខ២ ហើយក្រុមសហរដ្ឋអាមេរិកឈរលេខ៣ រកបានមេដាយមាស ១៣គ្រឿង នឹងក្រុមប្រេស៊ីល រកបានមេដាយមាស ១២គ្រឿង ខណៈក្រុមអត្តពលិកឈរក្រោមទង់អព្យាក្រឹត (NPA) មានមេដាយសរុប ៣៥គ្រឿងបណ្តោះអាសន្ន ។
សូមជម្រាបផងថា ព្រឹត្តិការណ៍កីឡាប៉ារ៉ាឡាំពិក Paralympics Games 2024 និងបិទបញ្ចប់ការប្រកួតនៅថ្ងៃទី០៨ ខែកញ្ញានេះ ខណៈអត្តពលិកកម្ពុជា វ៉ាន់ វ៉ុន នឹងធ្វើការប្រកួតលើវិញ្ញាសាប្រណាំងរទេះ ១០០ម៉ែត្រ នៅថ្ងៃទី០៤ នៅវេលាម៉ោង១២ (ម៉ោងនៅបារាំង) ។
បញ្ជាកផងថា សម្រាប់អត្តពលិកប៉ារ៉ាឡាំពិកអព្យាក្រឹត (NPA) គឺជាឈ្មោះដែលត្រូវបានប្រើដើម្បីតំណាងឱ្យអត្តពលិករុស្ស៊ី និងបេឡារុស្ស ដែលត្រូវបានអនុម័តនៅប៉ារ៉ាឡាំពិករដូវក្តៅឆ្នាំ២០២៤ បន្ទាប់ពីគណៈកម្មាធិការប៉ារ៉ាឡាំពិកអន្តរជាតិ (IPC) បានហាមឃាត់ការចាត់តាំងតំណាងឱ្យប្រទេស ដោយសារតែការឈ្លានពានរបស់រុស្ស៊ីលើអ៊ុយក្រែនក្នុងឆ្នាំ២០២២ ៕
