(ប៉ារីស)៖ អត្តពលិកប៉ារាំឡាំពិកកម្ពុជា វ៉ាន់ វ៉ុន បានបញ្ចប់បេសកម្មហើយ ក្នុងការប្រកួតព្រឹត្តិការណ៍ប៉ារ៉ាឡាំពិករដូវក្តៅ Paralympics Games 2024 ដែលធ្វើបានលេខរៀងទី៥ ក្នុងវគ្គជម្រុះវិញ្ញាសាប្រណាំងរទេះ ១០០ម៉ែត្រ ជាមួយពេលវេលា ១៤.៥៨វិនាទី ត្រូវបានចាត់ទុកជាថិរវេលាល្អមួយផ្ទាល់ខ្លួនក្នុងរដូវកាលប្រកួតនេះផងដែរ​​ ។

រំលឹកផងថា អត្តពលិកប៉ារ៉ាឡាំពិកកម្ពុជា វ៉ាន់ វ៉ុន កាលនៅព្រឹត្តិការណ៍ប៉ារ៉ាឡាំពិកទីក្រុងតូក្យូ ២០២០ បានឈានដល់វគ្គផ្តាច់ព្រ័ត្រជាមួយស្ថិតិថិរវេលាធ្វើបាន ១៤.២១វិនាទី ក្រោយឆ្លងកាត់វគ្គជម្រុះឈរលេខ២ ពីការធ្វើបានថិរវេលា ១៤.៣៩វិនាទី ។ នឹងជាអត្តពលិកកម្ពុជាឆ្នើមួយរូប ដែលធ្លាប់យកបានមេដាយប្រាក់ ២វិញ្ញាសាកាលនៅ ASEAN Para Games 2011 និងមេដាយសំរឹទ្ធ នៅឆ្នាំ២០១៥ ។

គិតត្រឹមថ្ងៃទី០៥ ខែកញ្ញានេះ ក្រុមអត្តពលិកចិន នៅតែបន្តនាំមុនគេនៅរកបានចំនួនមេដាយសរុបកើនដល់ ១៣៥គឿង ក្នុងនោះមានមេដាយមាសកើនដល់ ៦២គ្រឿងច្រើនជាងគេ ខណៈចក្រភពអង់គ្លេស នៅឈរលេខ២ មានមេដាយសរុប ៧៤គ្រឿង ហើយក្រុមអាមេរិក ឈរលេខ៣ រកបានមេដាយសរុប ៦៣គ្រឿង។

ជាមួយគ្នានោះ ក្រុមម្ចាស់ផ្ទះបារាំង នៅតែឈរលេខ៥ កើនមេដាយមាសដល់ ១៥គ្រឿងនឹងសរុប ៥០គ្រឿង ខណៈក្រុមអត្តពលិកហូឡង់ ឡើងមកឈរលេខ៤ ពីការកើនមេដាយមាសដល់ ១៦គ្រឿង ពេលដែលការប្រកួតនឹងបិទបញ្ចប់ជាផ្លូវការនៅថ្ងៃទី០៨ ខែកញ្ញា ឆ្នាំ២០២៤ នេះ ៕