(ឡុងដ៍)៖ ក្រុមបាល់ទាត់ Aston Villa បានបញ្ជាក់តម្លៃសំបុត្រទាំង ៣ប្រភេទសម្រាប់អ្នកគាំទ្រជាយុវជន ក្នុងចំណោម ៤ប្រកួតក្នុងដីរបស់ពួកគេ នៅព្រឹត្តិការណ៍ UEFA Champions League រដូវកាលឆ្នាំ២០២៤-២០២៥។ នេះបើយោងតាមការចេញផ្សាយដោយគេហទំព័រកីឡា BBC នៅថ្ងៃនេះ។

តម្លៃសំបុត្រសម្រាប់ទស្សនាក្នុងដីទាំង ៤ប្រកួតរបស់ Aston នៃវគ្គ ៣៦ក្រុម គឺត្រូវបានបែងចែកជា ៣ប្រភេទក្នុងតម្លៃ ១១២ដុល្លារ ១២៤ដុល្លារ និងតម្លៃ ១២៨ដុល្លារ។

តែយ៉ាងណាតម្លៃសំបុត្រទាំងនេះ កំពុងស្ថិតក្នុងការពិចារណាបញ្ចុះថ្លៃបន្ថែមទៀតដែរ ដោយរំពឹងថាមកនៅត្រឹម ៩២ដុល្លារ ១០៤ដុល្លារ និង ១០៨ដុល្លារវិញ។

ក្រុមសមាជិកលេងនៅ Premier League មួយនេះ នឹងត្រូវធ្វើជាម្ចាស់ផ្ទះ ដើម្បីទទួលស្វាគមន៍ Bayern Munich, Bologna, Juventus និង Celtic នៅកីឡដ្ឋាន Villa Park របស់ខ្លួន ក្នុងនាមជាក្រុមមានកៅអីលេងពានអឺរ៉ុប UEFA Champions League លើកដំបូងផងដែរ ក្រោយរង់ចាំអស់ ៤១ឆ្នាំមកនេះ។

ពួកគេនឹងត្រូវចាប់ផ្តើមយុទ្ធនាការ Champions League តាមរយៈប្រកួតបើកឆាកលេងនៅប្រទេសស្វីស ដោយប៉ះក្រុម Young Boys នាថ្ងៃទី១៧ ខែនេះ នៅមុនពេលធ្វើម្ចាស់ផ្ទះទទួលក្រុមមកពីអាល្លឺម៉ង់ Bayern Munich ដែល Aston ធ្លាប់បានយកឈ្នះកាលផ្តាច់ព្រ័ត្រពាន European Cup ក្នុងឆ្នាំ១៩៨២ នាថ្ងៃទី០២ ខែតុលា ឆ្នាំ២០២៤៕