(ភ្នំពេញ)៖ សាលាអន្តរជាតិមែនន័រ (Manner International School)​​ ដែលជាសាលាចំណេះដឹងទូទៅបានសម្រេចបញ្ចូលសិក្សាវិធីថ្មីមួយទៀត គឺកម្មវិធីសហគ្រិនភាពសម្រាប់កុមារ (KidsMBA) ដើម្បីរួមចំណែកជាមួយក្រសួងអប់រំ យុវជន និងកីឡា និងរាជរដ្ឋាភិបាល ក្នុងការបណ្តុះជំនាញសហគ្រិនភាពដល់សិស្សានុសិស្សនៅកម្ពុជា​ ក្នុងគោលដៅជំរុញឱ្យពួកគេក្លាយជាសហគ្រិនភាពដ៏ឆ្នើមនាពេលខាងមុខ។

ការបញ្ចូលកម្មវិធីសិក្សា ABE-KidsMBA-UK នៅ​សាលាអន្តរជាតិមែនន័រនេះ បន្ទាប់ពីសាលាអន្តរជាតិមែនន័រ បានចុះកិច្ចព្រមព្រៀងទទួលសិទ្ធ ជាមួយ ABE Global​ នាថ្ងៃទី១២ ខែកញ្ញា ឆ្នាំ២០២៤ នេះ​ ដែលធ្វើឱ្យសាលាអន្តរជាតិមែនន័រ គឺជាសាលាតែ​មួយគត់នៅកម្ពុជា ដែលទទួលបានការអនុវត្តកម្មវិធីសិក្សា ABE-KidsMBA នេះ។

លោក រឿន ចន្ថា ស្ថាបនិក និងប្រធានក្រុមប្រឹក្សាភិបាលនៃសាលាអន្តរជាតិមែនន័រ បានឱ្យដឹងថា ​កម្មវិធីសិក្សា ABE គឺជាកម្មវិធីដែលមានមូលដ្ឋាននៅប្រទេសអង់គ្លេស។ ការបង្កើតកម្មវិធីនេះឡើងគឺដើម្បីបង្រៀនដល់សិស្សានុសិស្ស​ដែលមានអាយុចាប់ពី១១ឆ្នាំឡើងទៅ ឱ្យពួកគេមានបំនិនក្នុងការសរសេរគម្រោងអាជីវកម្ម។ ​

​​លោកបានគូសបញ្ជាក់ថា​​  ​បន្ទាប់ពីទទួលបានសិទ្ធ ពី ABE Global​ សាលាអន្តរជាតិមែនន័រ នឹងដាក់បញ្ជូលកម្មវិធីសិក្សានេះ ចាប់ឆ្នាំសិក្សា ២០២៤-២០២៥ តទៅ សម្រាប់សិស្សថ្នាក់ទី៧ ដល់ថ្នាក់ទី១២ ដើម្បីជំរុញឱ្យពួកគេក្លាយជាសហគ្រិនភាពដ៏ឆ្នើមនាពេលខាងមុខ ក៏ដូចជាក្លាយជាបុគ្គលិកឆ្នើមនៅក្នុងក្រុមហ៊ុនដែលមានគំនិតក្នុងការបង្កើតថ្មី។

លោកបន្ថែមថា តាមរយៈការដាក់បញ្ចូលកម្មវិធីសិក្សាABE នេះ នឹងជំរុញឱ្យសិស្សានុសិស្សរបស់ សាលាអន្តរជាតិមែនន័រ ​កាន់តែពេញចិត្តក្នុងការសិក្សារៀនសូត្រ ព្រមទាំងទទួលបានការគាំទ្រពីអាណាព្យាបាល និងមាតាបិតាសិស្ស ព្រោះនេះគឺជាឱកាសល្អមួយដ៏កម្រ សម្រាប់ការអភិវឌ្ឍន៍សមត្ថភាព​ចាប់ពីកម្រិតមធ្យមសិក្សា ដើម្បីជាមូលដ្ឋាន ​ឈានទៅចាប់យកឱកាសសិក្សាបន្ថែមនៅថ្នាក់ឧត្តមសិក្សា ក៏ដូចជាចូលរួមក្នុងអភិវឌ្ឍន៍ប្រទេសជាតិ។

លោក ​Rob Kindness នាយកផ្នែកលក់នៃ ABE Global ​ប្រចាំតំបន់ អាស៊ីប៉ាស៊ីហ្វិក, មជ្ឈឹមបូព៌ា​, ​អាហ្រ្វិកខាងជើង និងចក្រភពអង់គ្លេស បានលើកឡើងថា ​កម្មវិធីសហគ្រិនភាពសម្រាប់កុមារ​គឺជាកម្មវិធីសិក្សាដែលមានសារៈប្រយោជន៍ណាស់សម្រាប់កុមារ។ តាមរយៈកម្មវិធីនេះ នឹងប​ង្រៀន​កុមារនូវជំនាញអាជីវកម្មជាមូលដ្ឋាន ដែលពួកគេនឹងត្រូវការនៅពេលពួកគេ​បញ្ចប់ការសិក្សា និងចាប់ផ្តើមអាជីពឬការបំពេញការងារ។ ​​កម្មវិធីនេះនឹងបង្រៀនកុមារនូវផ្នែកជំនាញទន់សំខាន់ៗមួយចំនួនដូចជា ផ្នែកស្ថិតិ ​ការដោះស្រាយបញ្ហា ការចរចា និងការសហការជាមួយដៃគូរជាដើម។  ​ហើយក៏នឹងជួយកុមារ​ ឱ្យពួកគេគិតប្រកបដោយភាពច្នៃប្រឌិត ដើម្បីសហការជាមួយមិត្តភ័ក្តិ។ ​

លោកបានឱ្យដឹងថា «កម្មវិធី ABE ត្រូវបានទទួលស្គាល់ និងមានសាខាដៃគូរជាច្រើននៅទ្វីបអឺរ៉ុប ប្រទេសក្នុងទ្វីបអាហ្រ្វិកនិងនៅឥណ្ឌា។  ហើយជាការពិតណាស់ឥឡូវនេះនៅអាស៊ីអាគ្នេយ៍ ខ្ញុំពិតជាមានមោទនភាពណាស់ដែលសាលាអន្តរជាតិមែនន័រ គឺជាសាលាដំបូងគេក្នុងប្រទេសកម្ពុជាដែលបើកដំណើរការ ABE Endored kidMBA»។​

សាលាអន្តរជាតិមែនន័រ មានទីតាំងស្ថិតនៅ អគារ91C ផ្លូវ 99B ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ​​។ សាលាអន្តរជាតិនេះ បាននិងកំពុងរៀបចំសាខាទី២ ដែលនឹងទទួលចុះឈ្មោះចូលរៀនចាប់ពីខែតុលា ឆ្នាំ២០២៤ ខាងមុខនេះ ​បន្ទាប់ពី​ទទួលបានគាំទ្រ ទំនុកចិត្ត និងភាពជឿជាក់យ៉ាងខ្លាំងសំណាក់ពីមាតា បិតា និងអ្នកអាណាព្យាបាល។

សាលាអន្តរជាតិមែនន័រផ្តល់កម្មវិធីសិក្សា៣ភាសាក្នុងពេលតែមួយ (Trilingual Education) ​ចាប់ពីថ្នាក់មត្តេយ្យ ដល់ថ្នាក់ទី១២ ដោយផ្តោតទៅលើបំណិនសតវត្សរ៍ទី២១ ពង្រឹងវិន័យជាដាច់ខាត និងបណ្តុះឥរិយាបថ និងភាពជាពលរដ្ឋល្អ។ គោលបំណងរួមរបស់សាលាអន្តរជាតិមែនន័រគឺបណ្តុះកុមារឱ្យក្លាយជាពលរដ្ឋដ៏ល្អ ឆ្លាតវៃ និងពូកែ ពិតប្រាកដ (Cultivating good and smart citizens)។

សូមបញ្ជាក់ថា​ សិស្សានុសិស្សសិក្សានៅសាលាអន្តរជាតិមែនន័រនឹងទទួលបានសញ្ញាបត្រធំៗ ចំនួន៤ បន្ទាប់ពីបញ្ចប់ថ្នាក់ទី១២ (មធ្យមសិក្សាទុតិយភូមិ) រួមមាន៖
១.សញ្ញាបត្រមធ្យមសិក្សាទុតិយភូមិ
២.សញ្ញាបត្រផ្នែកភាសាអង់គ្លេសរបស់ Cambridge​​​​
៣.សញ្ញាបត្រផ្នែកភាសាចិនស្តង់ដាអន្តរជាតិ (Chinses Proficiency Test-HSK)
៤.សញ្ញាបត្រផ្នែកសហគ្រិនភាពកុមារ របស់ចក្រភពអង់គ្លេស (ABE Global)​

ព័ត៌មានបន្ថែមសូមទំនាក់ទំនង ទូរស័ព្ទលេខ 017 404 098 (Telegram) / 098 808 850​ ​៕