(បរទេស)៖ ក្រុមហ៊ុន Nokia បានបដិសេធជាផ្លូវការនូវរបាយការណ៍ដែលបង្ហាញថាខ្លួនកំពុងស្វែងរកអ្នកជំនួសតំណែងប្រធាន និងនាយកប្រតិបត្តិ (CEO) របស់ខ្លួន គឺលោក Pekka Lundmark។ នៅក្នុងសេចក្តីថ្លែងការណ៍មួយដែលផ្តល់ទៅឱ្យ Reuters ក្រុមហ៊ុនបានសង្កត់ធ្ងន់ថា «ក្រុមប្រឹក្សាភិបាលគាំទ្រយ៉ាងពេញទំហឹងដល់ប្រធាន និង CEO លោក Pekka Lundmark ហើយមិនកំពុងដំណើរការដើម្បីជំនួសគាត់នោះទេ»។

យោងតាមរបាយការណ៍ពីទីភ្នាក់ងារសារព័ត៌មាន Reutes ដែលចុះផ្សាយនៅថ្ងៃទី១៣ ខែកញ្ញា ឆ្នាំ២០២៤នេះ បានដឹងថា​ Nokia បានបដិសេធទៅនឹងរបាយការណ៍របស់ Financial Time ដែលនិយាយថាខ្លួនកំពុងស្វែងរកនាយកប្រតិបត្តិថ្មី។ ក្រុមហ៊ុនហ្វាំងឡង់ដ៏ចំណាស់នេះ បានទទួលស្គាល់ថា ខ្លួនបានវាយតម្លៃជាបន្តបន្ទាប់នូវផែនការស្នងតំណែងរយៈពេលវែងរបស់ថ្នាក់ដឹកនាំរបស់ខ្លួន ដែលរួមមានការពិភាក្សាអំពីបេក្ខជនទាំងខាងក្នុង និងខាងក្រៅ ប៉ុន្តែរឿងរ៉ាវទាំងនេះ CEO របស់ខ្លួនសុទ្ធតែបានដឹងលឺទាំងអស់។ ទោះជាយ៉ាងណាក៏ដោយក្រុមហ៊ុន Nokia បានរំលឹកឡើងវិញថាមិនមានផែនការណាមួយនាពេលបច្ចុប្បន្នដើម្បីជំនួសតំណែងលោក Lundmark នោះទេ។

គួរជម្រាបថា លោក Lundmark ត្រូវបានតែងតាំងជា CEO របស់ Nokia ក្នុងឆ្នាំ២០២០។ ទាក់ទងនឹងការពិភាក្សាទាំងនេះ ត្រូវបានគេរំពឹងថាអាចនឹងទាក់ទងនឹងដំណើការហិរញ្ញវត្ថុថ្មីនេះរបស់ Nokia ខណៈដែលក្រុមហ៊ុនមានអាយុកាលដ៏ចំណាស់នេះ បានរាយការណ៍ពីការធ្លាក់ចុះប្រមាណ ៣២ភាគរយ នៃប្រាក់ចំណេញប្រតិបត្តិការសម្រាប់ត្រីមាសទី២ ដោយលើកឡើងពីតម្រូវការខ្សោយសម្រាប់ឧបករណ៍ទូរគមនាគមន៍ 5G ប៉ុន្តែបាននិយាយថា ការលក់គួរតែងើបឡើងវិញនៅចុងឆ្នាំ២០២៤ ដោយមានជំនួយពីការបញ្ជាទិញពីអាមេរិកខាងជើង៕