(បរទេស)៖ ថ្មីៗនេះ YouTube បានប្រកាសបង្ហាញពីការរួមបញ្ចូលមុខងារ AI ថ្មីពី Google DeepMind ក្នុងគោលបំណងបង្កើនជំនួយសម្រាប់ Content Creator ដែលផលិតមាតិការបង្ហោះនៅលើ​ Short​ ឬទម្រង់វីដេអូខ្លីៗ។ ប្រកាសនេះ ត្រូវបានធ្វើឡើងក្នុងអំឡុងព្រឹត្តិការណ៍ «Made on YouTube» នៅទីក្រុងញូវយ៉កនៅថ្ងៃទី១៨ ខែកញ្ញា ឆ្នាំ២០២៤។

យោងតាមការចេញផ្សាយដោយ CNBC នៅថ្ងៃពុធសប្តាហ៍នេះបានបង្ហាញថា មុខងារបញ្ញាសិប្បនិម្មិត AI ថ្មីនេះមានឈ្មោះថា «Veo» ដែលនឹងអនុញ្ញាតឱ្យបង្កើតផ្ទៃខាងក្រោយ (Backgroud) តាមរយៈ AI-generated នៅក្នុងទម្រង់វីដេអូ Short។ មិនត្រឹមតែអ្នកប៉ុណ្ណោះអ្នកផលិតមាតិការលើ YouTube ក្នុងទម្រង់ Short នេះថែមទាំងអាចបញ្ចូលអក្សររត់នៅក្នុងវីដេអូ និងអាចដំណើរការវីដេអូបានរយៈពេល ៦វិនាទីក្នុងមួយឃ្លីបវីដេអូ។ អ្វីដែលកាន់តែពិសេសនោះ AI ថ្មីនេះនិងចេញមកជាមួយនឹងមុខងារផ្តល់គំនិតដល់ Content Creator ក្នុងការផលិតវីដេអូថែមទៀតផង។

នាយកប្រតិបត្តិ (CEO) YouTube លោក​ Neal Mohan បាននិយាយថា លោកសង្ឃឹមថា Veo នឹងអនុញ្ញាតឱ្យអ្នកផលិតមាតិការអាចផលិតវីដេអូបានកាន់តែច្រើនបន្ថែមទៀត ដោយមានជំនួយពី AI។ លោក​ Mohan បាននិយាយនៅក្នុងព្រឹត្តិការណ៍ Made on YouTube នោះថា «អ្វីៗគ្រប់យ៉ាងដែលយើងបានបង្ហាញជាមួយ AI គឺចង់ពង្រឹងការងារដែលអ្នកធ្វើ, ធ្វើឱ្យកាន់តែលឿន, មានប្រសិទ្ធិភាពជាងមុន ដើម្បីនាំយកគំនិតច្នៃឱ្យបានលឿនមុនគេ»។

គួរជម្រាបថា មុខងារ AI ថ្មីនេះនឹងដាក់ឱ្យប្រើប្រាស់ជាផ្លូវការនៅចុងឆ្នាំ ២០២៤ខាងមុខនេះ។ ដូច្នេះសម្រាប់អ្នកដែលបំណងចង់ក្លាយជាអ្នកផលិតមាតិការរកចំណូលនៅលើ YouTube អាចងាកមកសាកល្បងមុខងារថ្មីនេះ ខណៈវានឹងកាន់តែផ្តល់ភាពងាយស្រួលដោយមិនចាំបាច់ចំណាយពេលឌីហ្សាញដោយខ្លួនឯង ឬរកគំនិតនៅក្នុងការផលិតវីដេអូយូរដូចមុន៕