(បរទេស)៖ ស្មាតហ្វូនអេក្រង់បត់ ៣តង់របស់ក្រុមហ៊ុនចិន Huawei ឥឡូវនេះចាប់ផ្តើមដាក់លក់ជាផ្លូវការហើយ ជាមួយនឹងតម្លៃ ​២,៨០០ដុល្លារក្នុងមួយគ្រឿង ដែលជាតម្លៃខ្ពស់បំផុត និងច្រើនជាង ២ដងបើធៀបនឹងតម្លៃ iPhone 16 Pro Max។ យ៉ាងណាបើទោះបីជាតម្លៃខ្ពស់ក៏ពិតមែន ប៉ុន្តែស្មាតហ្វូនអេក្រង់បត់ ៣តង់ Mate XT នេះហាក់ផ្ទុះការបញ្ជាទិញជាមុនជាខ្លាំង ខណៈរបាយការណ៍ចុះផ្សាយចុងក្រោយ បង្ហាញពីការព្រួយបារម្ភពីអ្នកវិភាគថាអាចនឹងខ្វះខាតសម្រាប់ផ្គត់ផ្គង់ទៅអតិថិជន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី២០​ ខែកញ្ញា ឆ្នាំ២០២៤។

ប្រិយមិត្តប្រាកដជាបានជ្រាបរួចមកហើយ នៅក្នុងឆ្នាំនេះក្រុមហ៊ុនចិន Huawei និង ក្រុមហ៊ុនយក្សអាមេរិក Apple បានរៀបចំព្រឹត្តិការណ៍ប្រកាសបង្ហាញស្មាតហ្វូនជំនាន់ចុងក្រោយរបស់ខ្លួនក្នុងពេលវេលាប្រកៀកប្រកិតគ្នា មិនត្រឹមតែប៉ុណ្ណោះសូម្បីតែថ្ងៃចេញលក់ជាផ្លូវការក៏ក្នុងថ្ងៃតែមួយផងដែរ។ ពោលគឺទាំង​ Apple និង Huawei បានដាក់លក់ស្មាតហ្វូននៅក្នុងប្រទេសចិនក្នុងថ្ងៃនេះតែម្តង (ថ្ងៃទី២០ ខែកញ្ញា)។​

យ៉ាងណារបាយការណ៍នេះ បង្ហាញពីការព្រមានរបស់អ្នកវិភាគជាន់ខ្ពស់នៃក្រុមហ៊ុន Isaiah Research អ្នកនាង Lori Chang បានលើកឡើងពីការព្រួយបារម្ភអំពីឧបសគ្គនៃខ្សែសង្វាក់ផ្គត់ផ្គង់ ដែលអាចរារាំងសមត្ថភាពរបស់ក្រុមហ៊ុន Huawei ក្នុងការបំពេញការបញ្ជាទិញទាំងនេះ។ តាមការប៉ាន់ប្រមាណនៃការផលិតដំបូងបង្ហាញថា Huawei ប្រហែលជាអាចផលិតបានត្រឹមតែ ៥០០,០០០ គ្រឿងប៉ុណ្ណោះ ដោយសារបញ្ហាជាមួយសមាសធាតុសំខាន់ៗដូចជា បន្ទះអេក្រង់ និងកន្លាក់បត់អេក្រង់ជាដើម។​ លោក Will Wong អ្នកស្រាវជ្រាវជាន់ខ្ពស់នៅក្រុមហ៊ុនប្រឹក្សា IDC បាននិយាយថា «វានឹងមានបញ្ហាប្រឈមក្នុងការបញ្ជាទិញជាមុនឥឡូវនេះ» មានន័យថា ក្រុមហ៊ុន Huawei នឹងមិនអាចផ្គត់ផ្គង់គ្រប់គ្រាន់ក្នុងដំណាក់ទី១ នោះទេ។

គួរជម្រាបថា ការបញ្ជាទិញជាមុនសម្រាប់ស្មាតហ្វូនអេក្រង់បត់ ៣តង់ របស់ Huawei បានកើនឡើងលើសពី ៦.៥លានគ្រឿងមកទល់ពេលនេះ ដែលស្ទើរតែជាចំនួនទ្វេដងនៃស្មាតហ្វូនអេក្រង់បត់បានធម្មតាប្រហែល ៣.៩លានគ្រឿងដែលបានដឹកជញ្ជូនទូទាំងពិភពលោកក្នុងត្រីមាសទីពីរនៃឆ្នាំនេះ៕