(បរទេស)៖ លោក Changpeng Zhao ដែលជាអ្នកជំនួញដ៏ល្បីល្បាញជនជាតិកាណាដើមកំណើតចិន មានឈ្មោះហៅកាត់ថា CZ និងត្រូវបានគេស្គាល់ថា ជាអតីតនាយកប្រតិបត្តិនៃក្រុមហ៊ុន Binance ដែលជាទីផ្សារគ្រីបតូលំដាប់លេខ១ នៅលើពិភពលោកនោះ ត្រូវបានទីភ្នាក់ងារសារព័ត៌មាន Bloomberg រាយការណ៍មកថា បានដោះលែងពីមណ្ឌលកែប្រែក្នុងរដ្ឋកាលីហ្វ័រញ៉ាហើយ នៅថ្ងៃសុក្រ ទី២៧ ខែកញ្ញា ម្សិលមិញនេះ។​

យោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី២៨ ខែកញ្ញា​ ឆ្នាំ២០២៤ នេះបានឱ្យដឹងថា លោក Zhao ត្រូវបានកាត់ទោសឱ្យជាប់ពន្ធនាគាររយៈពេល ៤ខែកាលពីដើមឆ្នាំនេះ បន្ទាប់ពីបានសារភាពថា លោកពិតជាមានកំហុសពិតមែនក្នុងការបំពានច្បាប់របស់សហរដ្ឋអាមេរិក​ប្រឆាំងនឹងការលាងលុយកខ្វក់ តាមរយៈការផ្លាស់ប្តូររូបិយប័ណ្ណគ្រីបតូដ៏ធំបំផុតរបស់ពិភពលោក។ យ៉ាងណាជុំវិញព័ត៌មានលម្អិតផ្សេងទៀតទាក់ទងនឹងការដោះលែងនេះ Reuters មិនអាចទាក់ទងការិយាល័យពន្ធនាគារ ដើម្បីសុំការអត្ថាធិប្បាយបានទេ។

គួរជម្រាបថា បញ្ហាផ្លូវច្បាប់របស់លោក Zhao កើតចេញពីការសារភាពកំហុសរបស់លោកនៅក្នុងខែវិច្ឆិកា ឆ្នាំ២០២៣ ជាកន្លែងដែលលោកបានសារភាពថាបានបំពានច្បាប់លាងលុយរបស់សហរដ្ឋអាមេរិកពិតមែន។ ព្រះរាជអាជ្ញាបានគូសបញ្ជាក់ថា Binance បានធ្វេសប្រហែសក្នុងការរាយការណ៍ប្រតិបត្តិការគួរឱ្យសង្ស័យជាង ១០០,០០០ ជាមួយក្រុមភេរវករដែលបានកំណត់រួមមានក្រុមហាម៉ាស អាល់កៃដា និងរដ្ឋអ៊ីស្លាម។ ជាផ្នែកមួយនៃដំណោះស្រាយចំពោះការចោទប្រកាន់ទាំងនេះ Binance បានយល់ព្រមបង់ប្រាក់ពិន័យចំនួន ៤.៣២ពាន់លានដុល្លារ ខណៈដែល Zhao ខ្លួនឯងបានទទួលរងការផាកពិន័យសរុបចំនួន ១០០លានដុល្លារឯណោះ៕