(ឡុងដ៍)៖ គ្រូបង្វឹក Enzo Maresca បានចាត់ទុកថា ក្រុមរបស់លោកគឺ តោខៀវ Chelsea មិនអាចប្រណាំងប្រជែងជាមួយ Manchester City និង Arsenal បានទេនារដូវកាលនេះ។ នេះបើយោងតាមការចេញផ្សាយដោយ BBC។

លោកថា «សម្រាប់រដូវកាលឆ្នាំ២០២៤-២០២៥ នេះ Chelsea មិនអាចប្រណាំងប្រជែងទល់នឹងក្រុមធំមានដូចជា Man City ឬក៏ Arsenal បានទេ»។

ការថ្លែងបែបនេះត្រូវបានធ្វើឡើង បន្ទាប់ពីបុរសសញ្ជាតិអ៊ីតាលីរូបនេះដឹកនាំ Chelsea យកឈ្នះ Gent របស់ប៊ែលហ្ស៊ិក ៤-២ ក្នុងពានរង្វាន់លំដាប់ទី៣ អឺរ៉ុប UEFA Europa Conference League កាលពីរាត្រីថ្ងៃព្រហស្បតិ៍។

លោក Maresca បញ្ជាក់ថា «ហេតុអ្វីខ្ញុំនិយាយដូច្នេះ ក៏ព្រោះតែ Chelsea មិនទាន់បានត្រៀមខ្លួនរួចរាល់នៅឡើយទេ ដ្បិត City ស្ថិតក្រោមការបង្វឹករបស់គ្រូឆ្នើម ៩ឆ្នាំមកហើយ គ្រាដែល Arsenal មានរយៈពេល ៥ឆ្នាំ។ ប្រសិនបើអ្នកចង់ប្រណាំងប្រជែង អ្នកត្រូវការពេលវេលាយូរដូច្នោះដែរ»។

បន្ថែមលើនេះ លោក Maresca ចង់មានពេលវេលាយូរ និងការអត់ធ្មត់ផងដែរ ក្នុងរដូវកាលដំបូងរបស់លោកនៅ Stamford Bridge ដ្បិតតោខៀវ Chelsea មួយនេះបានឈានចូលឆ្នាំទី៣ ដែលស្ថិតក្រោមការគ្រប់គ្រងថ្មីរបស់លោក Todd Boehly និងក្រុមហ៊ុន Clearlake Capital។

លោកបានសង្កត់ធ្ងន់ថា «គោលដៅរបស់ពួកយើង គឺអភិវឌ្ឍន៍ទៅដោយសន្សឹមៗ ដើម្បីឈានដល់ចំណុចកំពូលដូចក្លិបទាំងនោះ ដ្បិតបច្ចុប្បន្ននេះ ពួកយើងពុំទាន់រួចរាល់នៅឡើយទេ ដោយចាំបាច់ត្រូវបានពេលវេលា ដើម្បីអភិវឌ្ឍន៍ និងដោះស្រាយនូវរឿងរ៉ាវជាច្រើនទៀតផងដែរ»៕