(បរទេស)៖​ ថ្មីៗនេះ ក្រុមហ៊ុន Intel China បានឆ្លើយតបទៅនឹងការចោទប្រកាន់យ៉ាងធ្ងន់ធ្ងរពីសមាគមសន្តិសុខអ៊ីនធឺណិតចិន (Cyber ​​Security Association of China ឬហៅកាត់ថា CSAC) ដែលបានចោទប្រកាន់ថា ក្រុមហ៊ុននេះមិនអើពើនឹងភាពងាយរងគ្រោះផ្នែកសុវត្ថិភាពនៅក្នុង processors របស់ខ្លួន ហើយបានអំពាវនាវឱ្យមានការត្រួតពិនិត្យឡើងវិញនៃផលិតផលដែលបានលក់នៅក្នុងប្រទេសចិន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៨ ខែតុលា ឆ្នាំ២០២៤។

សេចក្តីថ្លែងការណ៍របស់ CSAC ដែលត្រូវបានចែកចាយតាមរយៈ Weixin បានលើកឡើងពីបញ្ហាជាច្រើន រួមទាំងការអះអាងអំពីអត្រាបរាជ័យខ្ពស់ និងវត្តមាននៃ backdoors ដែលលាក់ទុកដែលអាចប៉ះពាល់ដល់សុវត្ថិភាពបណ្តាញ និងជួយសម្រួលដល់ការឃ្លាំមើលដោយសត្រូវបរទេស។

ឆ្លើយតបទៅនឹងការចោទប្រកាន់នេះ Intel China បានគូសបញ្ជាក់ថា ខ្លួនតែងតែផ្តល់អាទិភាពដល់សុវត្ថិភាព​ និងគុណភាពផលិតផល។ នៅក្នុងសេចក្តីថ្លែងការណ៍មួយនៅលើគណនី WeChat ផ្លូវការក្រុមហ៊ុន Intel ក្នុងប្រទេសចិននេះ​បាននិយាយថា «យើងនឹងបន្តចូលរួមជាមួយអាជ្ញាធរពាក់ព័ន្ធ ដើម្បីដោះស្រាយរាល់កង្វល់ដែលលើកឡើងដោយ CSAC»។

គួរជម្រាបថា ប្រសិនបើមានការត្រួតពិនិត្យពីនិយតករអ៊ីនធឺណិតរបស់ចិន​ពិតមែននោះ ត្រូវបានគេមើលឃើញថាអាចនឹងប៉ះពាល់ដល់ការលក់របស់ក្រុមហ៊ុន Intel ក្នុងប្រទេសចិនរហូតដល់មួយភាគបួននៃប្រាក់ចំណូលឯណោះ បើធៀបនឹងការលក់ដែលទទួលបានកាលពីឆ្នាំមុន៕