(បរទេស)៖​ ក្រុមហ៊ុន Taiwan Semiconductor Manufacturing Company (TSMC) បានបដិសេធជាសាធារណៈនូវរបាយការណ៍ ដែលថាសហរដ្ឋអាមេរិកកំពុងស៊ើបអង្កេតលើក្រុមហ៊ុនខ្លួន ជុំវិញការចោទប្រកាន់ថាខ្លួនបានផ្គត់ផ្គង់បន្ទះឈីបកម្រិតខ្ពស់ដល់ក្រុមហ៊ុន Huawei ដែលត្រូវបានចុះក្នុងបញ្ជីខ្មៅនៅក្នុងសហរដ្ឋអាមេរិក។ នេះបើយោងតាមការចេញផ្សាយដោយ CNBC នៅថ្ងៃទី២៣ ខែតុលា ឆ្នាំ២០២៤។

អ្នននាំពាក្យក្រុមហ៊ុន TSMC បានប្រាប់ CNBC នៅក្នុងសេចក្តីថ្លែងការណ៍មួយនៅថ្ងៃពុធសប្តាហ៍នេះថា «TSMC គឺជាក្រុមហ៊ុនដែលគោរពច្បាប់ ហើយយើងប្តេជ្ញាអនុវត្តតាមច្បាប់ និងបទប្បញ្ញត្តិដែលបានកំណត់ទាំងអស់ រួមទាំងការត្រួតពិនិត្យលើការនាំចេញផងដែរ»។ ប្រការនេះ កើតឡើងបន្ទាប់ពីបានចេញផ្សាយដោយ TechInsight ថាបានរកឃើញបន្ទះឈីបស៊េរីទំនើបរបស់ TSMC នៅក្នុងស្មាតហ្វូន​ Huawei។ ទន្ទឹមនឹងនេះ មានរបាយការណ៍អះអាងថា ក្រសួងពាណិជ្ជកម្មសហរដ្ឋអាមេរិក បានបើកការស៊ើបអង្កេតថាតើ​ TSMC ពិតជាបានផលិតបច្ចេកវិទ្យា AI ឬបន្ទះឈីបស្មាតហ្វូនសម្រាប់ក្រុមហ៊ុនចិន Hawei ដោយបំពានច្បាប់នាំចេញរបស់សហរដ្ឋអាមេរិក ពិតមែន ឬអត់។

អ្នកនាំពាក្យរូបនេះ បានគូសបញ្ជាក់ថា «យើងនឹងសហការជាមួយនឹងក្រសួងពាណិជ្ជកម្មសហរដ្ឋអាមេរិក ទាក់ទងនឹងបញ្ហានេះ។ យើងពិតជាមិនបានដឹងពិតមែនថា TSMC ជាកម្មវត្ថុនៃការស៊ើបអង្កេតណាមួយនៅពេលនេះទេ»។

គួរជម្រាបថា ក្រុមហ៊ុន TSMC ដែលជាក្រុមហ៊ុនផលិតបន្ទះឈីបកិច្ចសន្យាដ៏ធំបំផុតរបស់ពិភពលោក បានគូសបញ្ជាក់ថា ខ្លួនមិនបានផ្គត់ផ្គង់បន្ទះឈីបទៅឱ្យក្រុមហ៊ុន Huawei ចាប់តាំងពីពាក់កណ្តាលខែកញ្ញា ឆ្នាំ២០២០ មកម្លេះ។ ស្ថានភាពនេះ កើតឡើងចំពេលមានការត្រួតពិនិត្យកាន់តែខ្លាំងឡើងនៃខ្សែសង្វាក់ផ្គត់ផ្គង់ semiconductor និងការព្រួយបារម្ភលើការចូលប្រើបច្ចេកវិទ្យាដោយក្រុមហ៊ុនចិន ជាពិសេសក្រុមហ៊ុន Huawei ដែលស្ថិតនៅក្រោមការហាមឃាត់ពាណិជ្ជកម្មរបស់សហរដ្ឋអាមេរិកតាំងពីឆ្នាំ ២០១២៕