(បរទេស)៖ ប្រភពពីមន្ត្រីតៃវ៉ាន់ម្នាក់បានឱ្យដឹងថា ក្រុមហ៊ុន Taiwan Semiconductor Manufacturing (TSMC) បានផ្អាកការនាំចេញទៅកាន់អតិថិជន បន្ទាប់ពីបានរកឃើញថា មានបន្ទះឈីបរបស់ខ្លួននៅក្នុងផលិតផល Huawei ដែលអាចបំពានច្បាប់នាំចេញរបស់សហរដ្ឋអាមេរិក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន​ Reuters នៅថ្ងៃទី២៤ ខែតុលា ឆ្នាំ២០២៤។

មន្ត្រីពាណិជ្ជកម្ម និងសេដ្ឋកិច្ច ដោយសុំលាក់អត្តសញ្ញាណបានផ្តល់ព័ត៌មានថា ប្រហែលពីសប្តាហ៍មុន TSMC បានផ្អាកការនំាចេញផលិតផលបន្ទះឈីបរបស់ខ្លួនទៅកាន់អតិថិជន។ វាបានកើតឡើងនៅពាក់កណ្តាលខែតុលា បន្ទាប់ពីមានរបាយការណ៍ពីក្រុមហ៊ុនស្រាវជ្រាវ TechInsights បានរកឃើញបន្ទះឈីប TSMC នៅក្នុងឧបករណ៍បង្កើនល្បឿន Ascend 910B AI របស់ Huawei។ មន្ត្រីរូបនេះ មិនបានកំណត់អត្តសញ្ញាណអតិថិជនដែល TSMC បានផ្អាកការនាំចេញនោះទេ ខណៈតំណាងក្រុមហ៊ុន TSMC បានបដិសេធមិនធ្វើអត្ថាធិប្បាយ។​

តាមរយៈសេចក្តីថ្លែងការណ៍មួយទៅកាន់ CNBC នៅថ្ងៃពុធម្សិលមិញនេះ អ្នកនាំពាក្យ​ TSMC បាននិយាយថា «ខ្លួនគោរពតាមច្បាប់ ហើយបានប្តេជ្ញាអនុវត្តតាមច្បាប់ និងបទប្បញ្ញត្តិដែលបានកំណត់ទាំងអស់ រួមទាំងការត្រួតពិនិត្យលើការនាំចេញ»។ ព្រមទាំងបានបដិសេធជាសាធារណៈ ថាខ្លួនពិតជាមិនបានផ្គត់ផ្គង់ទៅ​ Huawei នោះទេ។ តែយ៉ាងទាក់ទិននឹងរបាយការណ៍នេះ ត្រូវបានគេមើលឃើញថាវាហាក់មានភាពមិនប្រក្រតី ថាតើហេតុអ្វីបានជាមានបន្ទះឈីបនៅក្នុង Huawei? វាទៅបានដោយរបៀបណា? ហើយសុខៗហេតុអ្វីបានជាបញ្ឈប់ការនាំចេញភ្លាមៗ៕