(សៀមរាប)៖ ព្រឹត្តិការណ៍ «ស្នាមញញឹមនៃកម្ពុជា» លើកទី២ រយៈពេល២ថ្ងៃ លើទឹកដីអង្គរ ដែលបានប្រារព្ធឡើងជាប្រវត្តិសាស្ត្របង្ហាញពីវប្បធម៌ អរិយធម៌ និងផ្ទាំងទស្សនីយភាពជាច្រើននោះ ទទួលបានជោគជ័យដ៏ត្រចះត្រចង់ និងបានការគាំទ្រទាំងភ្ញៀវជាតិ និងអន្តរជាតិ ដោយពួកគេបានចំណាយពេលវេលាចូលរួមលេងកម្សាន្តសប្បាយយ៉ាងច្រើនកុះករ និងប្រកបដោយស្នាមញញឹមគ្រប់ៗគ្នា។
ផ្តើមចេញពីភាពជោគជ័យ និងការគាំទ្រយ៉ាងពេញទំហឹងពីគ្រប់មជ្ឈដ្ឋានទាំងភ្ញៀវជាតិ និងអន្តរជាតិ នៅក្នុងព្រឹត្តិការណ៍ ស្នាមញញឹមនៃកម្ពុជា លើកទី១ ដែលសមាគមសិល្បករខ្មែរ បានរៀបចំឡើងកាលពីថ្ងៃទី១២ ដល់ថ្ងៃទី១៥ ខែសីហា ឆ្នាំ២០២៤ ក្រោមការជួយជ្រោមជ្រែង និងយកចិត្តទុកដាក់បំផុតពីលោកស្រីបណ្ឌិត ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ទាំងធនធានមនុស្ស ឧបករណ៍បរិក្ខាផ្សេងៗ និងទស្សនទានល្អៗ ទើបញ៉ាំងឱ្យមានព្រឹត្តិការណ៍ ស្នាមញញឹមនៃកម្ពុជា លើកទី២ លេចរូបរាងឡើងជាថ្មីនាពេលនេះ។
លោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ បានថ្លែងថា ព្រឹត្តិការណ៍ ស្នាមញញឹមនៃកម្ពុជា លើកទី២នេះ ត្រូវបានរៀបចំឡើងកាន់តែធំជាងមុន និងអស្ចារ្យជាងមុន តាមរយៈការចង្អុលបង្ហាញដោយផ្ទាល់ពី ក្រសួងវប្បធម៌ និងវិចិត្រសិល្បៈ និង សហការរៀបចំដោយរដ្ឋបាលខេត្តសៀមរាប ហើយក៏មានការសហការឧបត្ថម្ភគាំទ្រពីក្រសួងទេសចរណ៍ សហភាពសហព័ន្ធយុវជនកម្ពុជា និង អាជ្ញាធរអប្សរា។ ក្នុងនោះក៏មានការឧបត្ថម្ភធំពី ក្រុមហ៊ុន ជីប ម៉ុង គ្រុប និងក្រុមហ៊ុនដៃគូសហការជាច្រើនទៀតផងដែរ។
លោកជំទាវអ្នកឧកញ៉ា បានបន្ថែមថា ព្រឹត្តិការណ៍ ស្នាមញញឹមនៃកម្ពុជា លើកទី២នេះ ក៏ត្រូវបានសហការរៀបចំឡើងក្នុងគោលបំណងធំៗពីរ គឺទី១ ដើម្បីអបអរសាទរខួបទី២០ឆ្នាំនៃការគ្រងព្រះបរមសិរីរាជសម្បត្តិរបស់ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ។ ចំណែកទី២ព្រឹត្តិការណ៍នេះ ក៏ប្រារព្ធឡើងក្នុងគោលបំណងរួមគ្នាជំរុញការផ្សព្វផ្សាយពីសិល្បៈ វប្បធម៌ អរិយធម៌ដ៏ល្អផូរផង់របស់ខ្មែរ និងបង្ហាញពីសក្តានុពលវិស័យទេសចរណ៍នៅកម្ពុជា ទៅកាន់ភ្ញៀវជាតិ និងអន្តរជាតិ ពិសេសទៅកាន់ពិភពលោកទាំងមូល ដើម្បីជាការរួមចំណែកដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជាអាណត្តិទី៧ ក្រោមការដឹកនាំដ៏ឈ្លាសវៃ ប្រកបដោយគតិបណ្ឌិត និងចក្ខុវិស័យវែងឆ្ងាយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ពោលគឺរួមគ្នាសម្រេចឱ្យបាននូវគោលដៅយុទ្ធសាស្ត្របញ្ចកោណ-ដំណាក់កាលទី១ និងឈានទៅសម្រេចឱ្យបាន ចក្ខុវិស័យកម្ពុជានៅឆ្នាំ២០៣០ និងឆ្នាំ២០៥០។
ព្រឹត្តិការណ៍ ស្នាមញញឹមនៃកម្ពុជា លើកទី២នេះ នៅព្រឹកថ្ងៃទី២៩ ខែតុលា គឺជាពិធីបើកព្រឹត្តិការណ៍ ស្នាមញញឹមនៃកម្ពុជា លើកទី២ ជាផ្លូវការណ៍នៅមុខប្រាសាទអង្គរវត្ត ដោយមានការសម្តែងសិល្បៈផ្សេងៗ អមជាមួយនឹងការតាំងពិព័រណ៌សិល្បៈវប្បធម៌ចម្រុះផងដែរ។ រីឯនៅពេលរសៀល គឺជាព្រឹត្តិការណ៍ដ៏អស្ចារ្យនៃទស្សនីយភាពការដង្ហែក្បួនព្រះមហាក្សត្រខ្មែរនាសម័យអង្គរ និងការសម្តែងរបាំបុរាណខ្មែរជាច្រើនទម្រង់ ដោយក្នុងនោះមានសិល្បករ-សិល្បការិនីល្បីៗប្រមាណ៥០០នាក់បានស្ម័គ្រចិត្តចូលរួមសម្តែងយ៉ាងរស់រវើក។
លោកជំទាវអ្នកឧកញ៉ា បានបញ្ជាក់បន្ថែមថា ដោយឡែកនៅថ្ងៃទី៣០ ខែតុលានេះ កម្មវិធី ស្នាមញញឹមនៃកម្ពុជា ដែលក្នុងនោះមានកម្មវិធី រៀបចំពិព័រណ៌ភ្លក្សម្ហូបអាហារ នំចំណី ផ្លែឈើ និងភេសជ្ជៈបែបខ្មែរ មានការប្រគំតន្ត្រីខា្នតតូច ការសម្តែងផ្ទាំងទស្សនីយភាពល្បែង របាំ សិល្បៈផ្សេងៗជាច្រើនទម្រង់ អមដោយការអត្ថាធិប្បាយពីពិធីករ-ពិធីការិនីល្បីៗ ដើម្បីជាកិច្ចស្វាគមន៍ និងផ្តល់ភាពសប្បាយរីករាយជូនភ្ញៀវទេសចរជាតិ និងអន្តរជាតិ។
ដូច្នេះការប្រមូលផ្តុំ ជួបជុំគ្នារៀបចំព្រឹត្តិការណ៍ ស្នាមញញឹមនៃកម្ពុជា លើកទី២ នៅខេត្តសៀមរាប គឺជាកិច្ចខិតខំរួមគ្នាទាំងវិស័យរដ្ឋ និងឯកជន ដើម្បីផ្សព្វផ្សាយពីវឌ្ឍនភាពលើគ្រប់វិស័យរបស់កម្ពុជា មិនត្រឹមតែសិល្បៈវប្បធម៌ប៉ុណ្ណោះទេ ពោលគឺរួមគ្នាកសាងទំនុកចិត្ត កេរ្តិ៍ឈ្មោះកម្ពុជា (Image) និងបន្សាបនូវព័ត៌មានអវិជ្ជមាន និងគំនិតអគតិមួយចំនួនពីកម្ពុជា ទាំងលើឆាកជាតិ និងអន្តរជាតិ៕
