(ណានជីង)៖ Ronnie O’Sullivan ជើងខ្លាំងស្នូកឃើ បានឆ្លងចូលជុំទី៣ ជាបន្តទៀតនៃព្រឹត្តិការណ៍ International Championship 2024 នៅទីក្រុង Nanjing ប្រទេសចិន ក្រោយយកឈ្នះ He Guoqiang ក្នុងលទ្ធផល ៦-២ រួចមក។

ពីគេហទំព័រកីឡា BBC បានចេញផ្សាយថា នេះជាកម្មវិធីប្រកួតលើកដំបូង ដែលកីឡាករចាស់វស្សាអង់គ្លេស O’Sullivan ចូលរួម គិតចាប់តាំងពីបានចាញ់ He Guoqiang ក្នុងយុទ្ធនាការ English Open នាខែកញ្ញា ឆ្នាំ២០២៤។

អតីតជើងឯកពិភពលោក ៧លើកដែលបានចាញ់កីឡាករចិន He Guoqiang ២លើកនារដូវកាលនេះ បានបរាជ័យ frame បើកឆាក មុនពេលបានគ្រប់គ្រងការប្រកួតវិញ ជាមួយនឹងការវាយបានពិន្ទុខ្ពស់បំផុត ៧៣ ៨៧ ៨៣ និង ៧០ពិន្ទុទៀតផង។

ក្នុងការប្រកួតនាយប់មិញនេះដែរ Shaun Murphy ក៏បានទម្លាក់គូប្រជែង Anthony Hamilton ដ្បិតម្ចាស់ការពារតំណែងជើងឯក Zhang Anda យកឈ្នះ David Grace ដោយលទ្ធផល ៦-៣ ក្នុងជុំទី២ ដូចគ្នា៕