(ឡុងដ៏)៖ ក្រុមតោខៀវ Chelsea នៅពេលនេះបានបង្កើតកំណត់ត្រាជ័យជម្នះដ៏ធំបំផុត នៅការប្រកួតប្រជែងពានរង្វាន់លីគលំដាប់ទី៣ អឺរ៉ុប Europa Conference League 2024-25 បន្ទាប់ពីបានយកឈ្នះក្រុមមកពីលីគអាមេនី FC Noah យ៉ាងចាស់ដៃ ៨-០ ក្នុងប្រកួតទី៣ នៃវគ្គជម្រុះសន្សំពិន្ទុ ៣៦ក្រុម ។

ហើយតាមរយៈលទ្ធផលនេះ ក្រុមដឹកនាំដោយលោក Enzo Maresca រកបាន ៩ពិន្ទុឈរកំពូលតារាង ស្មើជាមួយក្រុម Legia Warsaw, Jagiellonia Bialystok, Rapid Wien, Vitoria de Guimaraes និងក្រុម FC Heidenheim ដែលលេងមិនចាញ់ដូចគ្នានៅចំណោម ៣ប្រកួតកន្លងមកនេះ ។

ស្ថិតក្នុងប្រកួតយកឈ្នះ FC Noah ៨-០ គឺនៅតង់ទី១ ក្រុមតោខៀវរកបាន ៦គ្រាប់ទៅហើយ ពីការស៊ុតរបស់ Adarabioyo បើកឆាកនៅទី១២ និងបន្តបន្ទាប់ជារកបានដោយកីឡាករ Marc Guiu, Disasi, Mudryk និងកីឡាករ Joao Felix រកបាន ២គ្រាប់ ហើយនៅតង់ទី២ Nkunku ធ្វើបាន ២គ្រាប់ម្នាក់ឯងផងដែរ ។

គិតត្រឹម ៣ប្រកួតរបស់ Chelsea ពេលនេះពួកគេមានគ្រាប់ស៊ុតលើគូប្រជែងសរុប ១៦គ្រាប់ និងមានគ្រាប់បាល់ចំណេញ ១៣គ្រាប់ជាមួយនឹងលក្ខខណ្ឌប្រកួតលីគទី៣ នេះ ក៏មិនខុសគ្នាទៅការប្រកួតពានទី១ និងទី២ របស់អឺរ៉ុបនោះទេ គឺក្រុមដែលបញ្ចប់ពីលេខ១ ដល់លេខ៨ មានសិទ្ធឡើងទៅលេងវគ្គ ១៦ក្រុមជាបន្ត ហើយក្រុមឈរពីលេខ៩ ដល់លេខ២៤ ត្រូវលេខវគ្គ play-off ជាបន្ត ៕