(បរទេស)៖ ភាគហ៊ុនរបស់ Samsung Electronics ដែលជាក្រុមហ៊ុនផលិតបន្ទះឈីប Memory កំពូលរបស់ពិភពលោក បានធ្លាក់ចុះដល់កម្រិតទាបបំផុតក្នុងរយៈពេលជាង៤ឆ្នាំ ចំពេលមានការព្រួយបារម្ភអំពីផលប៉ះពាល់នៃកត្តាពន្ធគយរបស់សហរដ្ឋអាមេរិក ក្រោមរដ្ឋបាលថ្មីរបស់លោក Donald Trump។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី១៣ ខែវិច្ឆិកា ឆ្នាំ២០២៤។

ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងមួយនេះ ត្រូវបានរាយការណ៍មកថា ភាគហ៊ុនហាក់ដំណើរការមិនល្អនោះទេក្នុងចំណោមក្រុមហ៊ុនផលិតបន្ទះឈីបសកលដូចជា TSMC និង Nvidia ក្នុងឆ្នាំនេះ ដោយសារក្រុមហ៊ុននេះ បានដើរយឺតជាងគូប្រជែងក្នុងការទាញយកតម្រូវការនៃកើនឡើងសម្រាប់បន្ទះឈីបបញ្ញាសិប្បនិម្មិត AI។ លោក Lee Min-hee អ្នកវិភាគនៅក្រុមហ៊ុន BNK Investment បាននិយាយថា ពន្ធដ៏មានសក្តានុពលរបស់លោក Trump លើការនាំចូលរបស់ចិន ត្រូវបានគេមើលឃើញថាកំពុងប្រឈមមុខនឹងបញ្ហាធំជាងមុន ដល់ក្រុមហ៊ុន Samsung ដែលមានការពឹងផ្អែកខ្ពស់លើអតិថិជនចិន ជាងគូប្រជែងក្នុងស្រុករបស់ខ្លួនគឺ SK Hynix ខណៈ ក្រុមហ៊ុន Hynix បាននិងកំពុងបង្កើនការលក់បន្ទះឈីបម៉ាស៊ីនមេ AI កម្រិតខ្ពស់ដល់អតិថិជនអាមេរិកដូចជា Nvidia ជាដើម។

លោក Greg Noh អ្នកវិភាគនៅក្រុមហ៊ុន Hyundai Motor Securities បាននិយាយថា លោក Trump បានគំរាមដាក់ពន្ធសកល ១០% លើការនាំចូល និង ៦០% លើទំនិញរបស់ចិន ដែលនឹងកាត់បន្ថយតម្រូវការសម្រាប់ផលិតផលអេឡិចត្រូនិកដែលប្រើប្រាស់បន្ទះឈីប។ កាលពីសប្តាហ៍មុន ប្រធានាធិបតីកូរ៉េខាងត្បូង Yoon Suk Yeol ក៏បានលើកឡើងពីក្តីបារម្ភថា ការគំរាមកំហែងរបស់ Trump លើពន្ធដ៏ខ្ពស់លើការនាំចូលរបស់ចិន អាចជំរុញឱ្យគូប្រជែងចិនកាត់បន្ថយតម្លៃនាំចេញ និងកាត់បន្ថយក្រុមហ៊ុនបន្ទះឈីបរបស់កូរ៉េនៅក្រៅប្រទេស។

គួរជម្រាបថា ជុំវិញក្តីបារម្ភនេះបាននាំឲ្យភាគហ៊ុនរបស់ក្រុមហ៊ុន Samsung ធ្លាក់ចុះ ៣៤% ពីមួយឆ្នាំទៅមួយឆ្នាំ។ តែយ៉ាងណា ងាកមកភាគហ៊ុនរបស់ក្រុមហ៊ុន SK Hynix បានកើនឡើង ៣២% រហូតមកដល់ពេលនេះ ត្បិតអតិថិជនរបស់ក្រុមហ៊ុន SK Hynix ជាក្រុមហ៊ុនអាមេរិក ហើយនៅឆ្នាំនេះ ក្រុមហ៊ុនផលិតបន្ទះឈីបរបស់សហរដ្ឋអាមេរិក Nvidia បានកើនឡើង ១៩៩%ផងដែរ៕