(បរទេស)៖ កីឡាករស្នូកឃើ Mark Williams បានឡើងទៅកាន់វគ្គ ៤នាក់ចុងក្រោយនៃពានរង្វាន់ Champion of Champions 2024 នៅពេលវាយបកទម្លាក់គូប្រជែង Kyren Wilson ៦-៥ នៅរាត្រីថ្ងៃអង្គារ ថ្ងៃប្រកួតចុងក្រោយប្រចាំ Group Two។

ពីគេហទំព័រកីឡា BBC បានចេញផ្សាយថា កីឡាករអន្តរជាតិវ៉េលរូបនេះបានធ្វើការវាយបកយកបានជ័យជម្នះ ៦-៥ បន្ទាប់ពីត្រូវបាន Wilson បើកការនាំមុខ ៥-៣ ដើម្បីទម្លាក់ម្ចាស់ការពារតំណែងជើងឯកមួយនេះ។

ក្នុងប្រកួតនោះដែរ Williams កីឡាករស្នូកឃើឈរនៅលំដាប់លេខរៀងទី៦ ពិភពលោកផងនោះ តាមបាន ២សិតមកវិញ ក្រោយពេល Wilson នាំមុខ ៣-២ ជាមួយនឹងពិន្ទុជ័យជម្នះ ១០៩ និង ៧២ពិន្ទុ និងបន្តធ្វើបានល្អទៀតសម្រាប់ ២សិតចុងក្រោយ ដោយវាយបានពិន្ទុសរុបដល់ទៅ ១៤០ និង ៧១ពិន្ទុ ដ្បិត Wilson ធ្វើបានសិតចុងក្រោយជាមួយនឹងពិន្ទុខ្ពស់បំផុត ១២៣ទៀតផង ក្នុងប្រកួតដែលត្រូវបានធ្វើឡើងនៅទីក្រុង Bolton ប្រទេសអង់គ្លេស។

គួរបញ្ជាក់ផងថា កីឡាករបញ្ចប់ក្នុងតំណែងលេខ១ ប្រចាំពូលនីមួយៗ នឹងត្រូវឡើងទៅវគ្គពាក់កណ្តាលផ្តាច់ព្រ័ត្រ មុនពេលវគ្គផ្តាច់ព្រ័ត្រនឹងត្រូវធ្វើឡើងនៅរាត្រីថ្ងៃអាទិត្យចុងសប្តាហ៍នេះ ជាមួយនឹងប្រាក់រង្វាន់ ១៥០,០០០ផោន សម្រាប់ម្ចាស់ជើងឯក៕