(វ៉ាស៊ីនតោន)៖ សហរដ្ឋអាមេរិក បានយកឈ្នះហ្សាម៉ាអ៉ីក (Jamaica) ៤-២ ជាលើកទី២ ត្រឹមរយៈពេល ៥ថ្ងៃប៉ុណ្ណោះ ដើម្បីឡើងទៅវគ្គពាក់កណ្តាលផ្តាច់ព្រ័ត្រពានរង្វាន់ប្រចាំតំបន់អាមេរិកខាងជើង Concacaf Nations League 2024-2025។

ពីគេហទំព័រកីឡា BBC បានចេញផ្សាយថា អាមេរិកបន្ថែមជ័យជម្នះ ១-០ កាលពីជើងទី១ នៅទីក្រុង Kingston កាលពីរាត្រីថ្ងៃព្រហស្បតិ៍សប្តាហ៍មុន មុនបន្តបំបាក់ ៤-២ ក្នុងផ្ទះរបស់ខ្លួននៃវគ្គ ៨ក្រុមចុងក្រោយ Nations League។

នេះជាការបោះជំហានទៅមុខ ដ្បិតក្រុមជម្រើសជាតិអាមេរិកស្ថិតក្រោមការដឹកនាំដោយគ្រូបង្វឹកអាហ្សង់ទីន គឺលោក Mauricio Pochettino នៅកីឡដ្ឋាន St Louis ដ្បិតពួកគេបានគ្រងតំណែងជើងឯក Nations League ៣សម័យកាលជាប់ៗគ្នាមកដែរ។

អាមេរិក ដែលជាប្រទេសម្ចាស់ផ្ទះ World Cup 2026 ជាមួយកាណាដា និងមិចស៊ិកផងនោះ នឹងរកឃើញគូប្រកួតវគ្គ ៤ក្រុម ក្រោយពេលវគ្គ ៨ក្រុមត្រូវបានបញ្ចប់ ដែលគ្រោងធ្វើឡើងនៅថ្ងៃទី២០ ខែមីនា ឆ្នាំ២០២៥ មុនពេលផ្តាច់ព្រ័ត្រធ្វើឡើងនៅ ៣ថ្ងៃបន្ទាប់ នៅទីក្រុង Inglewood ស្ថិតក្នុងរដ្ឋ California៕