(ភ្នំពេញ)៖ ដើម្បីចូលរួមចំណែកជាមួយរាជរដ្ឋាភិបាល ក្នុងការលើកស្ទួយវិស័យបាល់ទាត់នៅប្រទេសកម្ពុជា និងបង្កើតជាវេទិកាកីឡាថ្មីមួយបន្ថែមទៀតដល់យុវជនកម្ពុជា ដែលមកពីបណ្តាអង្គភាព ឬស្ថាប័ន​ផ្សេងគ្នា មានមុខងារវិជ្ជាជីវៈខុសៗគ្នា មានឱកាសក្នុងការជួបជុំគ្នា បង្កើតនិងរឹតចំណងមិត្តភាព បង្កើនកិច្ចសហប្រតិបត្តិការ និងបណ្តុះស្មារតីរួបរួមសាមគ្គី RTNK Group បានរៀបចំព្រឹត្តិការណ៍ប្រកួតបាល់ទាត់​ដណ្ដើមពាន​រង្វាន់ អ ធី អិន ខេ ឆ្នាំ២០២៥ នឹងចាប់ផ្តើមនៅថ្ងៃទី៣០ ខែវិច្ឆិកា ឆ្នាំ២០២៤ រហូតដល់ថ្ងៃ៥ ខែមករា ឆ្នាំ២០២៥ ដើម្បីដណ្តើមយកទឹកប្រាក់ចំនួន ២០លានរៀល និងបើកឱ្យមានការចុះឈ្មោះចូលរួមដោយសេរី។

ព្រឹត្តិការនេះឧបត្ថម្ភធំដោយ RTNK Group Co., Ltd. ដែលមានលោកឧកញ៉ា ឈាង សុវណ្ណរតនៈ ជាស្ថាបនិក និងអគ្គនាយក ដើម្បីផ្តោតការយកចិត្តទុកដាក់ និងចូលរួមសហការយ៉ាងសកម្ម និងអស់ពីកម្លាំងកាយចិត្តក្នុងវិស័យកីឡាក្នុងប្រទេសកម្ពុជា។

កម្មវិធីបើកជាផ្លូវការព្រឹត្តិការណ៍ប្រកួតបាល់ទាត់ដណ្ដើមពានរង្វាន់ អ ធី អិន ខេ ឆ្នាំ២០២៥ នឹងប្រព្រឹត្តទៅនៅថ្ងៃទី៣០ ខែវិច្ឆិកា ឆ្នាំ២០២៤ ចាប់ពីម៉ោង ៣រសៀល ដល់ម៉ោង ៨ល្ងាច នៅក្លឹបកីឡា ផ្លា ទីនីម ជ្រោយចង្វារ ក្រោមអធិបតីភាពលោកឧកញ៉ា ឈាង សុវណ្ណរតនៈ អមដោយការសម្តែងគុនល្បុក្កតោ ការប្រកួតមិត្តភាពរវាងក្រុម អ ធី អិន ខេ និងក្រុមផាន់រ៉ុង និងការសម្តែងចម្រៀងពីក្រុមក្មេងខ្មែរ។

ការប្រកួតនឹងចាប់ផ្តើមឡើងនៅថ្ងៃទី៣០ ខែវិច្ឆិកា ឆ្នាំ២០២៤ រហូតដល់ថ្ងៃ០៥ ខែមករា ឆ្នាំ២០២៥ ដោយការកំណត់យករាល់ថ្ងៃសៅរ និងថ្ងៃអាទិត្យ ចាប់ពីម៉ោង ៤រសៀល ដល់ម៉ោង ៦ល្ងាច នៅក្លឹបកីឡា ផ្លាទីនីម ជ្រោយចង្វារ។ ក្រុមជ័យលាភីនឹងទទួលបាននូវពានរង្វាន់ និងប្រាក់រង្វាន់ជាច្រើន ដែលសរុបជាទឹកប្រាក់ រហូតទៅដល់ ២០ លានរៀល។

ជាមួយគ្នានេះផងដែរ RTNK Group Co., Ltd. សូមស្វាគមន៍យ៉ាងកក់ក្តៅចំពោះអ្នកស្នេហាវិស័យកីឡាបាល់ ទាត់ទាំងអស់ក្នុងការចូលរួមចុះឈ្មោះជាកីឡាករ និងបណ្តាក្រុមហ៊ុនដៃគូរសហការ​ទាំង​អស់ក្នុងការចូលរួមឧបត្ថម្ភក្នុងព្រឹត្តិការណ៍ប្រកួតបាល់ទាត់ដណ្ដើមពានរង្វាន់ អ ធី អិន ខេ ឆ្នាំ២០២៥៕