(ម៉ាឌ្រីដ)៖ តារាឆ្នើមប្រចាំក្រុម Jude Bellingham និង Kylian Mbappe រកបានម្នាក់ ១គ្រាប់ ក្នុងជ័យជម្នះ ៣ទល់នឹង០ របស់អធិរាជស Real Madrid ទៅលើម្ចាស់ផ្ទះ Leganes មុនជួបក្រុមខ្លាំង Liverpool នៅកម្មវិធី UCL នារាត្រីថ្ងៃពុធ។

១គ្រាប់បន្ថែមនេះដែរ ធ្វើឱ្យខ្សែបម្រើអន្តរជាតិអង់គ្លេស Bellingham កើនបាន ១៩គ្រាប់ហើយ ពីការចូលលេងបាន ២៨ប្រកួតនៅ La Liga និងបានកាត់បន្ថយគម្លាតមកនៅត្រឹម ៤ពិន្ទុវិញពីក្រុមកំពូលតារាង FC Barcelona គិតត្រឹមសប្តាហ៍ទី១៤ ជើងទី១ ដែលក្រុមការពារតំណែងជើងឯកមួយនេះនៅសល់ ១ប្រកួតក្នុងដៃទៀតដែរ។

ក្នុងប្រកួតដែលត្រូវបានធ្វើឡើងនៅកីឡដ្ឋាន Estadio Municipal de Butarque ដោយមានអ្នកទស្សនាតែជាង ១ម៉ឺននាក់នោះ ខ្សែប្រយុទ្ធចំណូលថ្មី Mbappe ជាអ្នកបញ្ចប់ទីគ្រាប់ទី១ នៅជិតបញ្ចប់វគ្គទី១ ដែលជាគ្រាប់ទី៧ ក្នុងលីគអេស្ប៉ាញ នៅមុនពេលមិត្តរួមក្រុមមកពីអ៊ុយរូហ្គាយ Federico Valverde ធ្វើបានសម្រេចនៅគ្រាប់ទី២។

Leganes ដែលលេងមិនទាន់ឈ្នះ Real Madrid នោះ មិនអាចធ្វើការឆ្លើយតបពីការបំប៉ោងសំណាញ់ទីរបស់ Thibaut Courtois បានទេ ដ្បិតស៊ុតពុំចំគោលដៅសូម្បីតែ ១លើកឡើយ។

តាមរយៈ ៣ពិន្ទុក្រៅដីនេះដែរ បានធ្វើឱ្យក្រុមរបស់លោក Carlo Ancelotti ឡើងទៅឈរលេខ២ ពីលើ Atletico Madrid មានគម្លាតពីគ្នាត្រឹម ១ពិន្ទុប៉ុណ្ណោះពី ៣០ពិន្ទុ និង២៩ពិន្ទុ៕