(ភ្នំពេញ)៖ មហាជនទូទៅបានស្គាល់ច្បាស់ហើយពិធីករល្បី សម្បូរវោហោរពោរពេញដោយសមត្ថភាព លោក ប៉ែន ចំរ៉ុង ទោះជារូបលោកមានការមមាញឹកជាកម្មវិធីទូរទស្សន៍ ឬកម្មវិធីជាពិធីករតាមបណ្តាលខេត្តក្តី តែលោកនៅព្យាយាមបន្ថែមអាជីពមួយទៀតនោះ គឺជាអ្នកនិពន្ទ និងតារាចម្រៀង។ សម្រាប់អាជីពថ្មីនេះ លោកនឹងបញ្ចេញស្នាដៃដោយផ្ដោតសំខាន់លើការលើកទឹកចិត្តដល់ស្រ្តី ជាពិសេសភរិយាគ្រប់ៗរូប ដែលបានតស៊ូគ្រប់បែបយ៉ាងដើម្បីគ្រួសារ។
ពីធិករ និងជាតារាសម្តែងលោក ប៉ែន ចំរ៉ុង បានបង្ហើបប្រាប់ Fresh News Plus ឲ្យដឹងថា លោកចង់បន្ថែមអាជីពជាតារាចម្រៀងដែលជាក្តីស្រមៃរបស់លោកកាលពីកន្លងទៅ មុននឹងធ្វើជាពិធីករទៅទៀត។ ក្នុងនោះលោកមានចម្រៀងចំនួនពីរបទ ដែលសុទ្ធតែជាបទចម្រៀងដែលមានអត្ថន័យលើកទឹកចិត្តដល់មនុស្សជុំវិញខ្លួន ជាពិសេសភរិយាជាទីស្រឡាញ់របស់លោក ដែលបំពេញតួនាទីជាច្រើនក្នុងគ្រួសារដោយមិនការនឿយហត់ក្តី។
លោក ប៉ែន ចំរ៉ុង ដែលជាពិធីករ និងជាអតីតតារាសម្តែងហើយនោះ បញ្ជាក់ទៀតថា បទចម្រៀងកាលពីកន្លងទៅ ដែលទាក់ទងនឹងចម្រៀង ពោលគឺមិនសូវជាមានការលើកទឹកចិត្ត ដូច្នេះឆាប់ៗនេះ លោកនឹងចេញចម្រៀងដែលជាលើកទឹកចិត្តដល់មនុស្សជុំវិញខ្លួន ជាពិសេសភរិយាជាទីស្រលាញ់របស់លោកតែម្តង ដែលតែងធ្វើការជាច្រើនមិនអាចគណនាបាន គឺលើសអ្នកបម្រើ មើលថែកូនៗ បំពេញតួនាទីជាម្តាយជាភរិយាដ៏ល្អ ហើយក៏ជាអ្នកនៅពីក្រោយភាពជោគជ័យរបស់លោកផងដែរ។
លោក ប៉ែន ចំរ៉ុង បន្តទៀតថា សូមឲ្យបងប្អូនងាកគាំទ្រស្នាដៃនិពន្ធចម្រៀងរបស់លោក ដែលមានការចូលរួមពីបណ្តាលអ្នកសិល្បៈជាច្រើន ដែលមានស្នាដៃក្នុងការផលិតចម្រៀង ដែលជាការលើកទឹកចិត្ត ផ្តល់តម្លៃដល់ស្ត្រីដែលជាមាតាពិភពលោក។ ពិធីករពោរពេញដោយវោហារ និងទេពកោសល្យក្នុងសិល្បៈលោក ប៉ែន ចំរ៉ុង បន្តថា កាលនៅពីកុមារភាពលោកចង់ក្លាយជាតារាចម្រៀងមួយរូប តែដោយសារពេលវេលានឹងឱកាសមិនសូវជាអំណោយផល លោកក៏ចាប់អាជីពជាតារាសម្តែងពិធីករ និងកាតសក់ការជាដើម ។
ក្នុងនោះដែរ លោកបញ្ជាក់ថា ក្រោយភាពជោគជ័យដែលបានកើតឡើងចំពោះលោក ពីមួយចំណុចទៅមួយចំណុច នាពេលបច្ចុប្បន្ន លោកក៏បានបន្ថែមអាជីពជាតារាចម្រៀងមួយទៀត។
គួរបញ្ជាក់ផងដែរថា កាលពីពេលកន្លងទៅ លោក ប៉ែន ចំរ៉ុង ក៏បានចេញចម្រៀងមួយបទ ក្រោមចំណងជើងថា «My ជីវិត» ដែលជាបទញាក់កន្ទ្រាក់អារម្មណ៍ ដែលធ្វើឲ្យរូបលោកមានទឹកចិត្តបន្តទៀត ក្នុងការផលិត និងតែងនិពន្ធចម្រៀងថ្មីៗបន្តទៀត៕
