(ភ្នំពេញ)៖ យ៉ាងហោចមានយុវជនស្រឡាញ់កីឡាបាល់ទាត់១៦ក្រុម នឹងជួបជុំប្រកួតគ្នាក្នុង «ព្រឹត្តិការណ៍ប្រកួតបាល់ទាត់ដណ្ដើមពានរង្វាន់ អ ធី អិន ខេ ឆ្នាំ២០២៥» នាចុងខែវិច្ឆិកា ឆ្នាំ២០២៥នេះ ដែលផ្ដួចផ្ដើមដោយក្រុមហ៊ុន RTNK Group ដើម្បីលើកស្ទួយវិស័យកីឡានៅកម្ពុជា រឹតចំណងមិត្តភាព សាមគ្គីភាព ភាតរភាព និងបង្កើនកិច្ចសហប្រតិបត្តិការ ក៏ដូចជាផ្តល់ឱកាសឱ្យយុវជនកម្ពុជាបញ្ចេញទេពកោសល្យ ពង្រឹងសមត្ថភាពនិងបច្ចេកទេសរបស់ខ្លួន ខណៈព្រឹត្តិការណ៍បាល់ទាត់នេះ សាធារណជនអាចទស្សនាដោយសេរី។

តាមរយៈសន្និសីទសារព័ត៌មានដែលធ្វើឡើងនាព្រឹកថ្ងៃទី២៧ ខែវិច្ឆិកា ឆ្នាំ២០២៤ នៅ Brew Coffee and Lounge ខណ្ឌបឹងកេងកងនោះ បានឱ្យដឹងថា ព្រឹត្តិការណ៍ប្រកួតបាល់ទាត់ដណ្ដើមពានរង្វាន់ អ ធី អិន ខេ នេះ ត្រូវបានកំណត់ធ្វើឡើងចាប់ពីថ្ងៃទី៣០ ខែវិច្ឆិកា ឆ្នាំ២០២៤ ដល់ថ្ងៃទី៥ ខែមករា ឆ្នាំ២០២៥ ដោយការប្រកួតនីមួយៗនឹងរៀបចំឡើងនៅរៀងរាល់ថ្ងៃសៅរ៍ និងថ្ងៃអាទិត្យ ចាប់ពីម៉ោង៤រសៀល ដល់ម៉ោង៦ល្ងាច នៅក្លឹបកីឡាផ្លាទីនីមជ្រោយចង្វារ ខណ្ឌជ្រោយចង្វារ។ ព្រឹត្តិការណ៍ប្រកួតបាល់ទាត់នេះដែរជាចលករដ៏ពិសេស និងដើរតួនាទីយ៉ាងសំខាន់មួយផ្នែកក្នុងការលើកស្ទួយវិស័យកីឡាបាល់ទាត់នៅកម្ពុជា។

នាឱកាសបើកព្រឹត្តិការណ៍នេះ ឧកញ៉ា ឈាង សុវណ្ណរតនៈ បានឱ្យដឹងថា គោលបំណងនៃការរៀបចំការប្រកួតបាល់ទាត់នេះ គឺដើម្បីចង់បណ្ដុះឆន្ទៈយុវជនកម្ពុជាក្នុងការលេងកីឡា ក៏ដូចជាចង់ចូលរួមចំណែកជាមួយរាជរដ្ឋាភិបាលដែលកំពុងយកចិត្តទុកដាក់លើកស្ទួយវិស័យកីឡាគ្រប់ទម្រង់។ ម្យ៉ាងទៀត ក៏ដើម្បីបង្កើតឱកាសសម្រាប់យុវជនកម្ពុជាក្នុងការជួបជុំគ្នា រឹតចំណងមិត្តភាព សាមគ្គីភាព ភាតរភាព បង្កើនកិច្ចសហប្រតិបត្តិការ ផ្តល់ឱកាសឱ្យយុវជនកម្ពុជាបញ្ចេញសមត្ថភាពនិងទេពកោសល្យរបស់ខ្លួន សាកល្បងកម្លាំង ពង្រឹងបច្ចេកទេសក្នុងការឈានទៅប្រកួតធំៗក្នុងក្របខណ្ឌជាតិ និងលំដាប់អន្តរជាតិផងដែរ។

ថ្លែងប្រាប់បន្ថែមជូនអ្នកសារព័ត៌មាន លោកឧកញ៉ា ឈាង សុវណ្ណរតនៈ បញ្ជាក់ដូច្នេះថា «រាល់ការចំណាយធនធានថវិកាផ្ទាល់ខ្លួនរបស់ខ្ញុំ និងក្រុមហ៊ុនបុត្រសម្ព័ន្ធក្នុងការរៀបចំព្រឹត្តិការណ៍ប្រកួតបាល់ទាត់នេះ មិនមែនដើម្បីប្រាក់ចំណេញចូលមកក្រុមហ៊ុន ឬភាគីណាមួយនោះទេ ប៉ុន្តែកិច្ចការនេះគឺចេញពីបេះដូងដែលចង់ចូលរួមលើកស្ទួយវិស័យកីឡាបាល់ទាត់ និងកីឡាផ្សេងៗទៀតនៅកម្ពុជា ទោះបីត្រឹមកម្រិតមួយមិនធំដុំក្ដី ប៉ុន្តែក៏ជាសកម្មភាពចូលរួមចំណែកមួយក្នុងការកសាងនិងអភិវឌ្ឍវិស័យកីឡា ពិសេសគឺការបណ្ដុះគំនិតស្មារតីដល់យុវជនឱ្យស្រឡាញ់ចូលចិត្តនិងលេងកីឡា ចៀសឆ្ងាយពីគ្រឿងញៀន អំពើអបាយមុខផ្សេងៗ»។

ជាមួយគ្នានោះដែរ លោក សាំង សុភ័គ ស្នងការប្រកួតនិងប្រធានក្រុមបច្ចេកទេស បានអំពាវនាវបន្ថែមដល់គ្រូបច្ចេកទេសនិងថ្នាក់ដឹកនាំក្រុមកីឡាករនីមួយៗ សូមជួយណែនាំពញ្ញាក់ស្មារតីដល់កីឡាករក្នុងក្រុមរបស់ខ្លួនឱ្យសហការលេងប្រកបដោយស្មារតីមិត្តភាព សាមគ្គីភាព ភាតរភាព យោគយល់អាធ្យាស្រ័យ និងបង្កើនកិច្ចសហប្រតិបត្តិការ ឬហៅឱ្យខ្លីថា Fair Play ពោលគឺកុំមានការប្រកែប្រកាន់គ្នា។

លោក សាំង សុភ័គ បានលើកបង្ហាញពីសារប្រយោជន៍ជាច្រើននៃការចូលរួមលេងកីឡានេះ ក្រៅពីដើម្បីសុខភាព ក៏មានការបង្កើនទំនាក់ទំនងពីបុគ្គលម្នាក់ទៅបុគ្គលម្នាក់ ពីក្រុមមួយទៅក្រុមមួយ ពីសាលាមួយទៅសាលាមួយ ពីប្រទេសមួយទៅប្រទេសមួយទៀតជាដើម រួមចំណែករឹតចំណងមិត្តភាព សន្តិភាព កិត្តិយសជាដើម។

លោក យ៉ាន់ យុទ្ធ ជំនួយការផ្ទាល់ឧកញ៉ា ឈាង សុវណ្ណរតនៈ បានអានរបាយការណ៍មួយចំនួនពាក់ព័ន្ធនឹងការប្រកួតនេះ ក្នុងនោះសមាសភាពក្រុមនិងកីឡាករចូលរួមប្រកួតមានចំនួន១៦ក្រុម ក្នុងមួយៗក្រុមបានចំនួនកីឡាករ៩នាក់។ រូបមន្តនៃការប្រកួត គឺកីឡាករលេង៦នាក់ និង៣នាក់បម្រុង។ ក្រុមទាំង១៦ក្រុម រួមមាន៖ ក្រុម Youngster FC ក្រុម C.A.P City Football Club ក្រុមក្រុងចក្រ ក្រុម Dragon City ក្រុម PTT PrekHo 50M ក្រុម RTNK Retail ក្រុម White Warrior FT ក្រុម Mashal FT ក្រុមយុវជនសេដ្ឋកិច្ចក្រៅប្រព័ន្ធកម្ពុជាក្រុម Night Eagle FT ក្រុមដង្ខៅ FC ក្រុម Mizuna FC ក្រុម CE&P FC ក្រុម AISAKI ក្រុម The Revolution Mini និងក្រុម Fire Unstoppable។

លោក យ៉ាន់ យុទ្ធ បានឱ្យដឹងទៀតថា ក្នុងការប្រកួតបាល់ទាត់ដណ្ដើមពានរង្វាន់ អ ធី អិន ខេ ឆ្នាំ២០២៥នេះ ចំពោះជ័យលាភីលេខ១ ទទួលបានពានរង្វាន់១ ប្រាក់ឧបត្ថម្ភចំនួន៤លានរៀល និងមេដាយមាសម្នាក់មួយ, ជ័យលាភីលេខ២ ទទួលបានប្រាក់ឧបត្ថម្ភចំនួន៣លានរៀល និងមេដាយប្រាក់ម្នាក់មួយ, ជ័យលាភីលេខ៣ ទទួលបានប្រាក់ឧបត្ថម្ភចំនួន២លានរៀល និងមេដាយសំរឹទ្ធម្នាក់មួយ និងជ័យលាភីលេខ៤ ទទួលបានប្រាក់ឧបត្ថម្ភចំនួន១លានរៀល។

បើតាមការបញ្ជាក់ក្នុងសន្និសីទសារព័ត៌មាននោះ ព្រឹត្តិការណ៍ប្រកួតបាល់ទាត់ដណ្តើមពានរង្វាន់ អ ធី អិន ខេ ឆ្នាំ២០២៥ លើកដំបូងនេះ ក៏នឹងការសម្តែងរបស់ក្រុមសិល្បករក្មេងខ្មែរ និងការសម្តែងក្បាច់គុនបុរាណខ្មែរ «គុនល្បុក្កតោផងដែរ» នៅក្នុងពិធីបើកការប្រកួតនៅថ្ងៃទី៣០ ខែវិច្ឆិកា ឆ្នាំ២០២៤ ចាប់ពីម៉ោង៣រសៀលតទៅ ហើយក៏មានការអនុញ្ញាតឱ្យសាធារណជនចូលរួមទស្សនាដោយសេរី នៅក្លឹបកីឡាផ្លាទីនីមជ្រោយចង្វារ៕