(បរទេស)៖ កាលពីសប្តាហ៍មុន មានរបាយការណ៍ដ៏គួរឱ្យភ្ញាក់ផ្អើលមួយបានអះអាងថា iPhone 17 Pro និង​ Pro Max ដែលនឹងមកដល់ក្នុងឆ្នាំ២០២៥ នឹងត្រឡប់ទៅប្រើស៊ុមអាលុយមីញ៉ូមវិញ ពោលគឺលែងទទួលបានតួខ្លួនទីតាញ៉ូមទៀតហើយ បន្ទាប់ពី Apple ប្រើតួគុណភាពខ្ពស់នេះទៅលើ iPhone ៣ជំនាន់មុន។ នេះបើយោងតាមការចេញផ្សាយដោយ GSMArena។

នៅថ្ងៃចន្ទដើមសប្តាហ៍នេះ ស្រាប់តែមានការលេចធ្លាយពី Weibo ខណៈវាផ្ទុយពីពាក្យចចាមអារ៉ាមនោះទាំងមូល ដោយអះអាងថា Apple នឹងមិនត្រឡប់ទៅប្រើតួរចាស់វិញទេ មិនសូម្បីតែដែកអ៊ីណុកក៏ដោយ។ តាមការបង្ហោះនោះបានគូសបញ្ជាក់ថា នេះគ្រាន់តែពាក្យចចាមអារ៉ាមតែប៉ុណ្ណោះ វាមិនមែនជារឿងពិតនោះទេ។

គួរជម្រាបថា អ្នកទម្លាយព័ត៌មានថ្មីនេះត្រូវបានគេស្គាល់ថាជា​ Instant Digital ដោយសង្កត់ធ្ងន់ថាការផ្លាស់ប្តូរទៅជាអាលុយមីញ៉ូមនឹងធ្វើឱ្យខូចដល់យុទ្ធសាស្រ្តទីផ្សាររបស់ក្រុមហ៊ុន Apple ដែលផ្តោតលើវត្ថុធាតុដើមពិសេស។ ប្រភពនេះបានលើកហេតុផលថា Apple បានផ្សព្វផ្សាយជាប្រចាំនូវសម្ភារៈកម្រិតខ្ពស់ដូចជាទីតាញ៉ូម ដែលជាចំណុចលក់ដ៏សំខាន់សម្រាប់ស៊េរី Pro របស់ខ្លួន។ ថាតើ «ហេតុ​អ្វី​បាន​ជាត្រូ​វប្តូរ​ទៅ​ជា​អាលុយមីញ៉ូម? គិត​ទៅ​វា​មិន​អាច​ទៅ​រួច​ទេ»៕