(ភ្នំពេញ)៖ សារមន្ទីរសេដ្ឋកិច្ច និងរូបិយវត្ថុព្រះស្រីឦសានវរ្ម័ន (សារមន្ទីរ ស.ស.រ) បានតាំងបង្ហាញរូបថតដ៏ពិសេសមួយដែលបានប្រារព្ធឡើង នៅថ្ងៃទី៩ ខែធ្នូ ឆ្នាំ២០២៤ ក្រោមការចូលរួមពីលោក Jacques Pellet ឯកអគ្គរដ្ឋទូតបារាំងប្រចាំកម្ពុជា និងលោកស្រី ជា សិរី ទេសាភិបាលធនាគារជាតិនៃកម្ពុជា។
នៅក្នុងពិធីនេះ ឯកអគ្គរដ្ឋទូតបារាំងបានបរិច្ចាគជាផ្លូវការ ជូនសារមន្ទីរ ស.ស.រ របស់ធនាគារជាតិនៃកម្ពុជា នូវរូបថតដ៏សំខាន់ជាប្រវត្តិសាស្ត្រ ដែលបានថតកាលពី៥០ឆ្នាំមុននៅកម្ពុជា ដោយអ្នកកាសែតជនជាតិបារាំងដ៏ល្បីល្បាញមួយរូបឈ្មោះ លោកស្រី Christine Spengler។
រូបថតនេះពិពណ៌នាអំពីទេសភាពជាយក្រុងភ្នំពេញ ដែលត្រូវបានបំផ្ទុះគ្រាប់បែកដោយ ខ្មែរក្រហម ក្នុងឆ្នាំ១៩៧៤។ ទិដ្ឋភាពនៅក្នុងរូបថត នាំឱ្យយើងនឹកឃើញអំពីប្រវត្តិសាស្រ្តដ៏ក្រៀមក្រំប្រកបដោយភាពច្របូកច្របល់ និងការតស៊ូរបស់កម្ពុជា។ បច្ចុប្បន្ន ស្នាដៃដ៏លេចធ្លោរបស់លោកស្រី Christine Spengler កំពុងដាក់តាំងបង្ហាញនៅក្នុងសាលតាំងពិព័រណ៍មិនអចិន្ត្រៃយ៍របស់សារមន្ទី ស.ស.រ ដែលជាការចូលរួមក្នុងកម្មវិធី មហោស្រពរូបថតភ្នំពេញលើកទី១៥ រហូតដល់ថ្ងៃទី២៨ ខែធ្នូ។
ស្នាដៃរបស់លោកស្រី Christine Spengler ក៏ត្រូវបានទទួលស្គាល់ទូទាំងពិភពលោក លើការថតផ្ដិតយករូបភាពក្នុងកាលៈទេសៈដ៏សខាន់មួយរបស់មនុស្សជាតិ។ ពីជម្លោះដែលញាំញីប្រទេសកម្ពុជា វៀតណាម ឆាដ អៀរឡង់ លីបង់ ឬអ៊ីរ៉ាក់ ចាប់តាំងពីទសវត្សរ៍ឆ្នាំ១៩៧០ មក លោកស្រីតែងតែជៀសវាងនូវរូបភាពដែលភ្ញោចឱ្យមានអារម្មណ៍រំជើបរំជួល ដោយជ្រើសរើសជំនួសវិញនូវ "ការផ្តោតលើអ្នករស់រានមានជីវិត ជាជាងលើអ្នកដែលបានបាត់បង់ជីវិត"។
លោក ប្លែស គីលីយ៉ង់ សហប្រធានសារមន្ទីរ ស.ស.រ បានថ្លែងអំណរគុណដល់ស្ថានទូតបារាំងសម្រាប់ការបរិច្ចាគរូបថតដ៏សំខាន់នេះ។ សារមន្ទីរស.ស.រ ដែលជាឃ្លាំងចំណេះដឹងពីប្រវត្តិសាស្ត្រ និងសេដ្ឋកិច្ច បានសា្វគមន៍សម្រាប់ការបន្ថែមឯកសារបណ្ណសារប្រវត្តិសាស្រ្តក្នុងសមុច្ច័យនេះរបស់ខ្លួន ហើយយើងខ្ញុំក៏មានក្តីសោមនស្សរីករាយក្នុងការតាំងបង្ហាញរូបថតរបស់ លោកស្រី Christine Spengler ជូនសាធារណជនទស្សនាក្នុងមហោស្រពរូបថតភ្នំពេញ ២០២៤។
ពិធីបរិច្ចាគនេះក៏ជាឱកាសមួយដើម្បីគូសបញ្ជាក់អំពីបេសកកម្មរបស់សារមន្ទីរ ស.ស.រ ក្នុងការលើកស្ទួយអំពីការយល់ដឹងពីប្រវត្តិសាស្ត្រ និងការអប់រំវប្បធម៌៕
