(មេនឆេស្ទើ)៖ ក្លិបបាល់ទាត់អាជីព Manchester City បានប្រកាសពីប្រាក់ចំណូលដុលនារដូវកាលមុន ដែលបានបំបែកកំណត់ត្រានៅលីគកំពូលអង់គ្លេស Premier League មានដល់ទៅ ៧១៥លានផោន គិតត្រឹមថ្ងៃទី៣០ ខែមិថុនា ឆ្នាំ២០២៤។ នេះបើយោងតាមការចេញផ្សាយដោយគេហទំព័រកីឡា BBC នៅថ្ងៃនេះ។

នេះមានន័យថា City មានការកើនឡើងនៃប្រាក់ចំណូលប្រមាណ ២.២លានផោន ក្នុងចំណោម ៧១៥លានផោន ច្រើនជាងចំណូលរដូវកាលមុនទៅទៀត។

គួរកត់សម្គាល់ផងថា ប្រាក់ចំណូលដ៏ច្រើនសន្ធឹកសន្ធាប់នេះដែរ បានមកពីរដូវកាលមុន ដែលពួកគេដណ្តើមបានជើងឯកដល់ទៅ ៣ពានធំៗនាអំឡុងឆ្នាំ២០២៣ និងគ្រប់គ្រង Premier League ៤សម័យកាលជាប់ៗគ្នាទៀតផង បូករួមទាំងជ័យជម្នះនៅ Club World Cup និង European Super Cup ថែមទៀតផង។

ក្រុមមេឃខៀវ Man City មួយនេះ ជារឿយៗតែងតែរកចំណូលបានបំបែកកំណត់ត្រាជានិច្ចជារៀងរាល់ឆ្នាំ គិតចាប់តាំងពីរដូវកាលឆ្នាំ២០១៤-២០១៥ មក លើកលែងតែរដូវកាលឆ្នាំ២០១៩-២០២០ ដែលជំងឺសកល កូវីដ-១៩ រីករាលដាលខ្លាំងតែប៉ុណ្ណោះ ដែលចំណូលរបស់ពួកគេមានការធ្លាក់ចុះ៕