(ឡុងដ៍)៖ លោក Thomas Frank គ្រូបង្វឹកនៃក្លិបឃ្មុំ Brentford បានយល់ឃើញថា «តោខៀវ Chelsea ប្រហែលជាក្លិបល្អផ្តាច់គេនៅ Premier League នាពេលបច្ចុប្បន្ន»។

ការថ្លែងបែបនេះ បន្ទាប់ពីលោក Enzo Maresca បានចូលដឹកនាំ Chelsea ជំនួសកៅអីគ្រូបង្វឹក Mauricio Pochettino កាលពីខែមិថុនា ឆ្នាំ២០២៤ ដោយទទួលបានជ័យជម្នះ ៦ប្រកួតជាប់ៗគ្នាគ្រប់កម្មវិធីប្រកួតតែម្តង មុនពេលទទួលក្រុម Brentford របស់លោក Frank នៅរាត្រីថ្ងៃអាទិត្យស្អែកនេះក្នុងលីគ។

តាមរយៈលទ្ធផលឈ្នះ ៤ប្រកួតជាប់គ្នាក្នុងលីគបែបនេះ បានញាំងឱ្យ Chelsea ឡើងទៅឈរនៅលេខរៀងទី២ ក្នុងតារាងពិន្ទុ Premier League ជាបណ្តោះអាសន្នវិញ ដោយចាញ់ប្រៀបក្រុមកំពូលតារាងហង្សក្រហម Liverpool តែ ៤ពិន្ទុប៉ុណ្ណោះ។

លោក Frank បានថ្លែងក្នុងសន្និសីទ មុនប៉ះគ្នានៅ Stamford Bridge ស្អែកនេះថា «Chelsea អាចមានទម្រង់លេងល្អច្រើនជាង Liverpool ក៏ថាបាន ទោះបីជាកំពុងតាមពីក្រោយហង្សក្រហមក៏ដោយ។ ពួកគេកំពុងលេងបាល់ទាត់ដ៏គួរឱ្យភ្ញាក់ផ្អើល ស្ថិតក្រោមការដឹកនាំរបស់គ្រូល្អ។ Maresca ធ្លាប់បានធ្វើការងារដ៏អស្ចារ្យកន្លងមក ជាមួយបុគ្គលិកបង្វឹករបស់គាត់ ដែលអាចចាត់ទុកថា Chelsea ជាក្រុមដ៏គ្រោះថ្នាក់មួយ»៕