(បរទេស)៖ អ្នកស្រាវជ្រាវទីផ្សារស្មាតហ្វូន Canalys បានរាយការណ៍មកថា ក្នុងត្រីមាសទី៣ ឆ្នាំ២០២៤ កន្លងទៅ ទីផ្សារនាឡិកាឆ្លាតវៃនៅទូទាំងពិភពលោកកំពុងមានសន្ទុះកើនឡើងគួរឱ្យកត់សម្គាល់ដោយក្នុងនោះ Smart Watch កើនឡើងប្រមាណ ៣ភាគរយ និង Smart Band កើនឡើងដល់ខ្ទង់ ៧ភាគរយ ដោយគិតចំនួននាំចេញសរុបមាន ៥២.៩លានគ្រឿង។ នេះបើយោងតាមការចេញផ្សាយដោយ GSMArena។
យោងតាមតារាងទីផ្សារ Canalys បានបង្ហាញថា ក្រុមហ៊ុន Apple និង Xiaomi ជាក្រុមហ៊ុនដែលលេចធ្លោជាងគេជាមួយនឹងចំណែកទីផ្សារ ១៦.១០ភាគរយ និងបាននាំចេញនាឡិកាសរុបចំនួន ៨.៥លានគ្រឿងដូចគ្នា។ ដោយឡែក Huawei ឈរនៅលេខរៀងទី៣ ជាមួយការនាំចេញ ៧.១លានគ្រឿង, Samsung ឈរនៅលេខរៀងទី៤ នាំចេញ ៤.៨លានគ្រឿង, Noise ឈរនៅលេខរៀងទី៥ នាំចេញ ២.៥លានគ្រឿង និងក្រុមហ៊ុនផ្សេងៗទៀត ២១.៤លានគ្រឿង សរុប ៥២.៩លានគ្រឿង។
គួរជម្រាបថា ការកើនឡើងក្នុងត្រីមាសទី៣ នេះ Canalys បានគូសបញ្ជាក់ថាមកពីការលក់ខ្លាំងនៃត្រកូល Apple Watch ជំនាន់ចុងក្រោយ និងជាពិសេសក្រុមហ៊ុនប្រកៀកប្រកិតនឹង Apple គឺ Xiaomi ម៉ូដែល Smart Band។ បន្ថែមពីនេះម៉ូដែល Redmi Watch 5 របស់ Xiaomi និង Watch S ក៏ត្រូវបានគេមើលឃើញជាម៉ូដែលដែលមានប្រជាប្រិយភាពខ្លាំងផងដែរ និងបានកើនឡើងប្រមាណ ៧០ភាគរយពីមួយឆ្នាំទៅមួយឆ្នាំ៕
