(ស្វាយរៀង)៖ ការប្រឡងចម្រៀង សិល្បៈចម្រុះនៅរោងកុនស្វាយរៀង ក្រុងស្វាយរៀង បានធ្វើឡើងនៅថ្ងៃទី១៥ ខែធ្នូ ឆ្នាំ២០២៤ ដោយមានការចូលរួមជាគណៈកម្មការកិត្តិយស ក្នុងការជ្រើសរើសបេក្ខជនជ័យលាភីដោយកញ្ញា យូ រី តារាចម្រៀងមានប្រជាប្រិយភាពនៅកម្ពុជា។
កញ្ញា យូ រី បានថ្លែងថា ការប្រឡងចម្រៀង សិល្បៈចម្រុះ ជម្រុះរកបេក្ខជនជ័យលាភី នាឱកាសនេះ គឺដើម្បីរកអ្នកដែលមានទឹកដមសមត្ថភាពទៅប្រឡងវគ្គផ្ដាច់ព្រ័ត្រនៅថ្ងៃទី១៣ ខែកុម្ភៈ ឆ្នាំ២០២៥ នៅក្រុមហ៊ុន «ឡាក់គី រ៉ូប៊ី» ស្ថិតនៅភូមិព្រៃវល្លិ៍ ឃុំថ្មី ស្រុកកំពង់រោទិ៍ ខេត្តស្វាយរៀង។
អ្នកទទួលបានជ័យលាភី នៅវគ្គផ្ដាច់ព្រ័ត្រ
*លេខ១ ទទួលបានរង្វាន់ធំទឹកប្រាក់ ៥,០០០ដុល្លារ
*លេខ២ ទទួលបានរង្វាន់ទឹកប្រាក់ ២,០០០ដុល្លារ និងរង្វាន់លើកទឹកចិត្ត ៣០០ដុល្លារ ក្នុងបេក្ខជនម្នាក់ៗ។
កញ្ញាយូ រី បានបន្តថា ចំពោះបេក្ខភាពទទួលបានជ័យលាភី នៅវគ្គពាក់កណ្ដាលផ្ដាច់ព្រ័ត្រនេះ គណៈកម្មការសម្រេចជ្រើសរើសយកបេក្ខជនចំនួន៨រូប ដើម្បីត្រៀមទៅប្រឡងនៅវគ្គផ្ដាច់ព្រ័ត្រ ហើយចំពោះបេក្ខជនដែលឈ្នះទាំង ៨រូប ត្រូវបានបង្ហោះនៅលើវេបសាយក្រុមហ៊ុន «ឡាក់គី រ៉ូប៊ី» ហើយបេក្ខជនដែលបានចុះឈ្មោះប្រឡងនៅវគ្គនេះមានចំនួន៩៩រូប។ បេក្ខជនអញ្ជើញចូលរួមប្រឡងចម្រៀងចូលរួម បានដោយសេរីប្រកបដោយការជឿជាក់ ទំនុកចិត្ត និងមានតម្លាភាព។
កញ្ញាបានបន្តថា នៅថ្ងៃទី១១ ខែមករា ឆ្នាំ២០២៥ គណៈកម្មការនឹងបន្តទៅជ្រើសរើសបេក្ខជនប្រឡងចម្រៀងវគ្គពាក់កណ្ដាលផ្ដាច់ព្រ័ត្រនៅកោះពេជ្រ រាជធានីភ្នំពេញ ដើម្បីរកបេក្ខជនទទួលបានជ័យលាភីបន្ថែមទៀត។ ការប្រឡង នៅវគ្គផ្ដាច់ព្រ័ត្រនៅក្រុមហ៊ុន «ឡាក់គី រ៉ូប៊ី» ស្ថិតនៅភូមិព្រៃវល្លិ៍ ឃុំថ្មី ស្រុកកំពង់រោទិ៍ ខេត្តស្វាយរៀង ជាការផ្តល់ឱកាសសម្រាប់ បេក្ខជនបេក្ខនារី ដែលខកខានមិនបានប្រឡងនៅថ្ងៃទី១៥ ខែធ្នូ ឆ្នាំ២០២៤ អាចអញ្ជើញ ទៅប្រឡងនៅ កោះពេជ្រ រាជធានីភ្នំពេញ បានដោយសេរីផងដែរ៕
