(បរទេស)៖ ខ្សែប្រយុទ្ធ Vinicius Jr ត្រូវបានបោះឆ្នោតជាកីឡាករល្អប្រចាំឆ្នាំ២០២៤ របស់សហព័ន្ធ FIFA នៅពេលគ្រូបង្វឹក Carlo Ancelotti ក៏ឈ្នះពានក្នុងនាមគ្រូបង្វឹកល្អដូចគ្នា។

នេះជាលើកដំបូងផងដែរ ដែលកីឡាករអន្តរជាតិប្រេស៊ីលរូបនេះ ដណ្តើមបានពានឯកត្តជន FIFA Best Award ដ្បិតកម្មវិធីប្រគល់ពាននេះដែរ ត្រូវបានធ្វើឡើងនៅទីក្រុង Doha ប្រទេសកាតា ជាទីដែល Real Madrid ត្រៀមប្រកួតពាន FIFA Intercontinental Cup 2024 ទល់នឹងក្រុម Pachuca របស់មិចស៊ិកនារាត្រីថ្ងៃពុធនេះដែរ។

នៅក្នុងការបោះឆ្នោតជុំចុងក្រោយនោះដែរ ខ្សែបម្រើ Manchester City គឹ Rodri បានឈរនៅតំណែងលេខ២ បន្ទាប់ពី Vinicius ដ្បិតកីឡាករអង់គ្លេស Jude Bellingham ឈរនៅលេខ៣។

បន្ថែមលើនេះ កីឡាករវ័យ ២៤ឆ្នាំ Vinicius ក៏ជាប់ឈ្មោះ ក្នុងចំណោមក្រុមល្អប្រចាំឆ្នាំ២០២៤ ទាំង ១១នាក់របស់ FIFA ទៀតផង ដោយមានកីឡាករ ៥នាក់មកពីលីគកំពូលអង់គ្លេស Premier League និង ៥នាក់ផ្សេងទៀតមកពី Real Madrid ក្នុងនោះក៏មានវត្តមានកីឡាករចូលនិវត្តន៍ Toni Kroos ទៀតផង និង Lamine Yamal មកពី FC Barcelona៕