(បរទេស)៖ ក្រុមអ្នកស្រាវជ្រាវនៅសាកលវិទ្យាល័យ Nanyang Technological University (NTU) ក្នុងប្រទេសសិង្ហបុរី បានបង្កើតវិធីសាស្រ្តប្រកបដោយភាពច្នៃប្រឌិត ដើម្បីបង្កើតសត្វកន្លាតឱ្យទៅជា «cyborg» ជាមួយនឹងការបង្កើនសក្តានុពលរបស់ពួកវាសម្រាប់ប្រតិបត្តិការស្វែងរក និងជួយសង្គ្រោះអ្នកនៅរស់រានមានជីវិតនៅក្រោមគំនរបាក់បែកជាដើម។
របកគំហើញនេះពាក់ព័ន្ធនឹងការភ្ជាប់ឧបករណ៍រំញោចចល័ត និងការទំនាក់ទំនងអេឡិចត្រូនិកទៅនឹងសត្វកន្លាតក្នុងដំណើរការដែលចំណាយពេលត្រឹមតែ ៦៨វិនាទីប៉ុណ្ណោះ បើប្រៀបធៀបទៅនឹងវិធីសាស្ត្រពីមុន រហូតដល់ ៣០នាទី ជាមួយនឹងអ្នកជំនាញឯកទេស។
លក្ខណៈសំខាន់ៗនៃប្រព័ន្ធ Cyborg Cockroach៖
- ការផលិត Cyborg Cockroach៖ វិធីសាស្ត្រក្នុងការផលិត Cyborg Cockroach ថ្មីនេះគឺលឿនជាងមុន និងចំណាយពេលលើស១នាទីប៉ុណ្ដឹងប៉ុណ្ណោះ។ របៀបនៃការតភ្ជាប់គឺយកនូវឧបករណ៍បច្ចេកវិទ្យាទៅបំពាក់នៅលើខ្នងរបស់សត្វកន្លាត និងប្រើប្រាស់បច្ចេកវិទ្យាកុំព្យូទ័រដើម្បីធ្វើស្វ័យប្រវត្តិកម្ម។ វិធីសាស្ត្រថ្មីនេះគឺអាចផលិតសត្វកន្លាត Cyborg បានរាប់រយ ឬរាប់ពាន់ក្បាលយ៉ាងមានប្រសិទ្ធភាព និងប្រើប្រាស់ពេលវេលាខ្លី។
- ការបញ្ជាពីចម្ងាយ៖ ឧបករណ៍ដែលបំពាក់នៅលើខ្លួនសត្វកន្លាតគឺជាវានឹងធ្វើការភ្ជាប់ទៅកាន់ប្រម៉ោយរបស់សត្វកន្លាត ដែលអនុញ្ញាតឱ្យធ្វើការបញ្ជាចលនារបស់វាបានតាមចិត្ត។
- គោលបំណង៖ សត្វកន្លាត Cyborg ត្រូវបានបង្កើតឡើងដើម្បីជួយក្នុងការស្ថានភាពគ្រោះមហន្តរាយ ដូចជាការស្វែងរកអ្នកនៅរស់រានមានជីវិតដែលជាប់នៅក្រោមគំនរបាក់បែកជាដើម។
ខណៈពេលដែលការផលិតសត្វកន្លាត cyborg ត្រូវបានសម្រួល ពេលនេះអ្នកស្រាវជ្រាវកំពុងផ្តោតលើវិធីគ្រប់គ្រងសត្វល្អិតទាំងនេះយ៉ាងមានប្រសិទ្ធភាព។ បញ្ហាប្រឈមនាពេលបច្ចុប្បន្នរួមមានការធានាថា cyborgs ជាច្រើនអាចដំណើរការដោយស្វ័យភាពដោយគ្មានការគ្រប់គ្រងពីប្រតិបត្តិករ ដែលមានសារៈសំខាន់សម្រាប់ការដាក់ពង្រាយទ្រង់ទ្រាយធំក្នុងអំឡុងពេលមានអាសន្ន។
ភាពជឿនលឿននេះមិនត្រឹមតែបង្ហាញពីចំណុចប្រសព្វនៃជីវវិទ្យា និងមនុស្សយន្តប៉ុណ្ណោះទេ ប៉ុន្តែថែមទាំងបង្ហាញពីសក្តានុពលសម្រាប់ដំណោះស្រាយប្រកបដោយភាពច្នៃប្រឌិតក្នុងស្ថានភាពធ្ងន់ធ្ងរ ដែលវិធីសាស្ត្របែបបុរាណអាចនឹងខ្វះខាត។
តើអ្វីទៅជា Cyborg?
Cyborg គឺជាសារពាង្គកាយមានជីវិតដែលមានទាំងផ្នែកសរីរាង្គ និងសិប្បនិម្មិត។ ការតភ្ជាប់ផ្នែករវាងសរីរាង្គ និងសិប្បនិម្មិត បានធ្វើឱ្យសមត្ថភាពរបស់សរីរាងត្រូវបានពង្រឹង ព្រោះថាផ្នែកសិប្បនិម្មិតដែលបានយកទៅតភ្ជាប់នោះវាគឺជាបច្ចេកវិទ្យាដែលត្រូវបានអ្នកវិទ្យាសាស្ត្រផលិតឡើងដើម្បីស្ដារមុខងារ និងពង្រឹងសមត្ថភាពរបស់ផ្នែកសរីរាង្គដែលបានតភ្ជាប់។ ទាំងផ្នែកសរីរាង្គ និងសិប្បនិម្មិតគឺអាចរស់នៅជាមួយគ្នាជាប្រចាំថ្ងៃបាន៕
