(ភ្នំពេញ)៖ ក្រោយបង្ហើបឈុតខ្លីសកម្មភាពថត MV បទ «កុលាបមានបន្លា» ច្រៀងដោយតារាចម្រៀង ព្រាប សុវត្ថិ និងទទួលបានការចាប់អារម្មណ៍ខ្លាំង រហូតមានអ្នកចូលទស្សនាជាង ៣លានដង ត្រឹម២៤ម៉ោង ស្រាប់តែមុននេះផលិតកម្ម Galaxy Navatra ក៏បានបញ្ចេញ Full MV ចម្រៀងមួយបទនេះជាផ្លូវការដល់ទៅពីរ Version តែម្តង ខណៈបទស្រីចៀងដោយកញ្ញា តន់ ចន្ទសីម៉ា។

តាមរយៈវីដេអូចម្រៀងផ្លូវការបទនេះ អ្នកគាំទ្របានបង្ហាញការពេញចិត្ត និងកោតសរសើរចំពោះការច្រៀង ក៏ដូចជាការសម្តែងកាយវិការរបស់តារាចម្រៀងជួរមុខទាំងពីររូបផងដែរ។

សូមជម្រាបថា រយៈពេលកន្លះម៉ោងក្រោយចេញវីដេអូចម្រៀងនេះ ក្នុងចំណោមអ្នកទស្សនាជាង ២ពាន់ដងលើ MV ចម្រៀង Version ប្រុស ច្រៀងនិងសម្ដែងផ្ទាល់ដោយតារាចម្រៀង ព្រាប សុវត្ថិ អមជាមួយទឹកដមសំឡេងពីរោះរណ្តំ ជាមួយចង្វាក់ភ្លេងបែបសម័យលាយឡំប្រពៃណី បូករួមនឹងកាយវិការរាំយ៉ាងរស់រវើក ធ្វើឱ្យអ្នកគាំទ្រលើកឡើងថា «នេះហើយជារសជាតិព្រាប សុវត្ថិ»។

តាមរយៈវីដេអូចម្រៀងផ្លូវការបទនេះដែរលោក ព្រាប សុវត្ថិ បានភ្ជាប់ជាមួយនឹងសារមួយជូនដល់សាធារណជន និងអ្នកគាំទ្ររបស់លោកថា «នេះជាបទថ្មីរបស់ខ្ញុំ សង្ឃឹមថាបងប្អូនស្រលាញ់ និងចូលចិត្តសម្រាប់ចម្រៀង១បទនេះ ហើយបងប្អូនក៏អាចបញ្ចេញមតិទីនេះបាន ដើម្បីឲ្យខ្ញុំអាចកែប្រែសម្រាប់បទបន្ទាប់របស់ខ្ញុំ»។

ជាមួយនឹងភាពដាក់ខ្លួនរបស់តារាចម្រៀងជួរមុខ របស់ផលិតកម្មធំរូបនេះ កាន់តែធ្វើឱ្យសាធារណជន ពិសេសអ្នកគាំទ្រ កាន់តែស្រលាញ់គាំទ្រលោកថែមទៀត។ ក្នុងនោះមានមតិខ្លះលើកឡើងថា «មានទាំងសមត្ថភាព ទេពកោសល្យ ហើយចេះដាក់ខ្លួនទៀត ស័ក្តិសមជា Legend ពិតៗ»។

គួរជម្រាបថា ក្នុងឆ្នាំ២០២៤ នេះ តារាចម្រៀងល្បីឈ្មោះជាច្រើនរូបរបស់ផលិតកម្មធំមួយនេះ កំពុងសាងភាពល្បីល្បាញឥតឈប់ឈរលើវិថីសិល្បៈ ខណៈចម្រៀងជាច្រើនបទរបស់តារាជួរមុខទាំងពីរ ក៏ផ្ទុះការចាប់អារម្មណ៍ច្រើនបទផងដែរ។ ជាក់ស្តែង បើគិតតែត្រឹមមួយរយៈពេលចុងក្រោយនេះ MV ចម្រៀងរបស់លោក ព្រាប សុវត្ថិ ផ្ទុះការចាប់អារម្មណ៍ផ្ទួនៗគ្នា តួយ៉ាងតាមរយៈ MV បទ «សែកមន្ត» និងបទ «កុលាបមានបន្លា»។ ចំណែកឯតារាចម្រៀងកញ្ញា តន់ ចន្ទសីម៉ា វិញក៏កំពុងផ្ទុះការគាំទ្របទ «សែកមន្ត» Version ស្រី និងបទ «រំលស់ប្រពន្ធ» ផងដែរ៕