(ភ្នំពេញ)៖ ការប្រកួតកីឡាការ៉ាតេជ្រើសរើសជើងឯកថ្នាក់ជាតិ ឆ្នាំ២០២៤ បានបើកការប្រកួតជាផ្លូវការហើយ ដោយមានប្រតិភូ គ្រូបង្វឹក និងកីឡាករ-កីឡាការិនី មកពី ២៨សាលាគុន សមាគម/ក្លិបចូលរួម ខណៈការប្រកួតគ្រោងនឹងចាប់ផ្ដើមពីថ្ងៃទី១៨-២២ ខែធ្នូ ឆ្នាំ២០២៤ ខាងមុខ នៅមជ្ឍមណ្ឌលជាតិហ្វឹកហ្វឺនកីឡាការ៉ាតេ សាកលវិទ្យាល័យភូមិន្ទភ្នំពេញ ។
យោងតាមរបាយការណ៍គណៈកម្មការរៀបចំការប្រកួត សម្រាប់ព្រឹត្តិការណ៍ថ្នាក់ជាតិប្រចាំឆ្នាំនេះ នឹងធ្វើការប្រកួតលើវិញ្ញាសាសរុបចំនួន ៤០ ទាំងប្រភេទវិញ្ញាសាសម្ដែង(កាតា) និងប្រយុទ្ធ ដែលមានចាប់ពីវិញ្ញាសាកុមាអាយុ ១២ឆ្នាំ រហូតដល់មនុស្សពេញវ័យ សរុបប្រតិភូ គ្រូបង្វឹក អាជ្ញាកណ្ដាល និងកីឡាករ-កីឡាការិនីមានចំនួន ៣៥២នាក់ ។
លោក សាយ ណូរ៉ា អនុប្រធានសហព័ន្ធកីឡាការ៉ាតេកម្ពុជា បានបញ្ជាក់ថា ការប្រកួតជើងឯកថ្នាក់ជាតិនេះ រៀបចំឡើង ប្រកបដោយបរិយាកាសរីករាយ ស្និទស្នាលយ៉ាងជ្រាលជ្រៅ ក្នុងគោលបំណងលើកកម្ពស់ ការអប់រំ សុខមាលភាព ខាងផ្លូវកាយ ផ្លូវចិត្ត និងបច្ចេកទេសដល់កីឡាករ- កីឡាការិនីទាំងអស់ ដើម្បីត្រៀមលក្ខណៈសម្បត្តិសម្រាប់ប្រកួតនាពេលនេះ។
ការប្រកួតនេះ ក៏ដូចជាការប្រមែប្រមូលធនធានអត្តពលិកមានសក្តានុពលពីការប្រកួតថ្នាក់ជាតិនេះ ត្រៀមការប្រកួតអន្ដរជាតិ និងត្រៀមចូលរួមប្រកួតកីឡាយុវជនអាស៊ី នាឆ្នាំ២០២៩ ដែលប្រទេសកម្ពុជា យើងធ្វើជាម្ចាស់ផ្ទះផងដែរ ៕
