(បរទេស)៖ ក្លិបអេស្ប៉ាញ Valencia បានកំពុងពិភាក្សាជាមួយ West Bromwich Albion ក្នុងការយកគ្រូបង្វឹករបស់ពួកគេ គឺលោក Carlos Corberan មកជំនួសតំណែងលោក Ruben Baraja ដែលត្រូវបានដកតំណែងកាលពីថ្ងៃចន្ទ។

យោងតាមប្រភពដែលបានប្រាប់ BBC Sport ឱ្យដឹងថា កិច្ចចរចានេះមិនទាន់បានបញ្ចប់នៅឡើយទេ បើទោះបីជា Valencia ព្រមព្រៀងបង់ប្រាក់ចាប់ពី ៣-៤លានផោនចំពោះការផ្តាច់កិច្ចសន្យាពីក្លិបអង់គ្លេស West Brom ដែលកំពុងឈរជើងនៅក្របខណ្ឌទី២ Championship ក៏ដោយ។

Valencia ដែលលេងនៅក្របខណ្ឌកំពូល La Liga បានឈានដល់ការដកតំណែងលោក Baraja កាលពីដើមសប្តាហ៍នេះ ក្រោយពេលរកបានជ័យជម្នះតែ ២លើកប៉ុណ្ណោះ ក្នុងចំណោម ១៧ប្រកួតនារដូវកាលនេះ និងបានកំពុងស្វះស្វែងរកអ្នកចាត់ការទូទៅថ្មី ដើម្បីមកជំនួសកន្លែងនេះដែរ ជាអ្វីដែលពួកគេបានមើលឃើញបុរសសញ្ជាតិអេស្ប៉ាញ វ័យ ៤១ឆ្នាំ ដែលកំពុងកាន់ការងារនៅ West Brom។

លោក Corberan អតីតគ្រូបង្វឹកក្លិប Huddersfield Town ត្រូវបានតែងតាំងជាគ្រូបង្គោល West Brom នាអំឡុងខែតុលា ឆ្នាំ២០២២ និងបានដឹកនាំពួកគេបញ្ចប់ក្នុងតំណែងលេខ៩ ក្នុងរដូវកាលដំបូងរបស់លោក និងបញ្ចប់ចំណាត់ថ្នាក់លេខ៥ រដូវកាលមុននៅ Championship ជាទីដែលពួកគេបានជម្រុះចាញ់ Southampton ពីការប្រជែងកៅអីជុំចុងក្រោយ ក្នុងការឡើងមកលេងនៅ Premier League វិញ៕