(ភ្នំពេញ)៖ ធនាគារអេស៊ីលីដា ដែលជាធនាគារខ្មែរដ៏ធំជាងគេនៅកម្ពុជា នាឱកាសចូលឆ្នាំថ្មី ឆ្នាំសកល ២០២៥ បានផ្ញើសារជូនពរទៅកាន់អតិថិជន និងដៃគូអាជីវកម្មរបស់ខ្លួន ព្រមទាំងបានប្រកាសពីការប្តេជ្ញាចិត្ត នឹងនាំមកនូវភាពច្នៃប្រឌិត និងនវានវត្តន៍ថ្មីៗបន្ថែមទៀត ដើម្បីបម្រើសេវាកម្មជូនដល់អតិថិជន និងសាធារណជន ឲ្យបានកាន់តែងាយស្រួល និងទូលំទូលាយ។

នាឱកាសដ៏មហានក្ខត្តឫក្ស នៃថ្ងៃចូលឆ្នាំថ្មី ចូល ឆ្នាំសកល ឆ្នាំ២០២៥លោកស្រី សុខ សោភា គណៈប្រធាននាយិកាប្រតិបត្តិ ប្រតិបត្តិការធនាគារ អេស៊ីលីដា បានសម្ដែងនូវក្ដីសោមនស្សរីករាយ និងថ្លែងអំណរគុណ យ៉ាងជ្រាលជ្រៅ ចំពោះកិច្ចគាំទ្រពីសំណាក់រាជរដ្ឋាភិបាលកម្ពុជា ជាពិសេស ធនាគារជាតិនៃកម្ពុជា, និយ័តករ មូលបត្រកម្ពុជា, ផ្សារមូលបត្រកម្ពុជា និងអាជ្ញាធរមានសមត្ថកិច្ចពាក់ព័ន្ធគ្រប់លំដាប់ថ្នាក់ រួមទាំង ដៃគូសហការ អាជីវកម្ម និងអតិថិជនជាទីគោរពស្រឡាញ់ទាំងអស់របស់អេស៊ីលីដា។

អស់រយៈពេលជាងបី ទស្សវត្សរ៍មកហើយ ដែលធនាគារអេស៊ីលីដា បានរួមចំណែកយ៉ាងផុសផុលក្នុងការ ផ្ដល់ និងបម្រើសេវាកម្មហិរញ្ញវត្ថុដ៏សម្បូរបែបទាន់សម័យកាល ប្រកបដោយវិជ្ជាជីវៈ និងក្រមសីលធម៌ខ្ពស់ រួមទាំង ការចូលរួម នៅក្នុងកិច្ចការសង្គមនានាផងដែរ។

លោកស្រី សុខ សោភា មានប្រសាសន៍បន្ថែមទៀតថា «ស្របតាមចក្ខុវិស័យ និងផែនការយុទ្ធសាស្ត្រ ធនាគារ អេស៊ីលីដា តែងបន្ដលើកកម្ពស់បរិយាប័ន្នហិរញ្ញវត្ថុ ជំរុញនវានវត្តន៍ហិរញ្ញវត្ថុ តាមរយៈការអភិវឌ្ឍផលិតផល-សេវាកម្មធនាគារ ដើម្បីបំពេញតម្រូវការនិង បម្រើជូនអតិថិជន-សាធារណជន ឲ្យកាន់តែមានភាពងាយស្រួល និងកក់ក្តៅបំផុត ។ នៅឆ្នំាថ្មីនេះ ធនាគារ អភិវឌ្ឍន៍អេប អេស៊ីលីដា ឲ្យក្លាយជា អេស៊ីលីដា ស៊ូភើអេប (ACLEDA Super App) សេវាទាំងអស់ស្ថិតក្នុងដៃលោកអ្នក (All-In Services in One Hand) ប្រកបដោយសុវត្ថិភាពខ្ពស់ បំផុត ដើម្បីឆ្លើយតបនឹងតម្រូវការរបស់អតិថិជន ដៃគូអាជីវកម្ម នាពេលបច្ចុប្បន្ន និងអនាគត ព្រមទាំងចូលរួម គាំទ្រ ដល់ការអភិវឌ្ឍសេដ្ឋកិច្ចជាតិ»។

ទន្ទឹមនឹងការបង្ហាញពីការប្តេជ្ញាចិត្ត បន្ដការអភិវឌ្ឍ ប្រតិបត្តិការកាន់តែប្រសើរឡើងនៅឆ្នាំថ្មីនេះ លោកស្រី សុខ សោភា ក៏បានកោតសរសើរនិងវាយតម្លៃខ្ពស់ ចំពោះលទ្ធផលការងារ របស់កម្មករនិយោជិត គ្រប់លំដាប់ថ្នាក់ ដែលបានបំពេញការងារ ប្រកបដោយថាមវន្ដ ប្រាជ្ញាឈ្លាសវៃ និងការទទួលខុសត្រូវខ្ពស់ទៅតាមតួនាទី និងភារកិច្ច ស្របតាមទស្សនៈ និងបេសកកម្ម និងគតិពេចន៍របស់ធនាគារអេស៊ីលីដា ដោយទទួលបាន នូវសមិទ្ធផល ការងារតាមការរំពឹងទុក៕