(ភ្នំពេញ)៖ ជាមួយសកម្មភាពសាមញ្ញៗ និងការដាក់ខ្លួនមិនឆ្មើងឆ្មៃ ឧកញ៉ា ព្រាប សុវត្ថិ ត្រូវបានមហាជនកោតសរសើរមិនដាច់ពីមាត់ នូវបុគ្គលិកលក្ខណៈរបស់តារាមចម្រៀងងារជាឧកញ៉ារូបនេះ ពិសេសជាមួយនឹងអប្បកិរិយាដ៏ល្អប្រពៃ ទាំងឫកពារ និងសម្តីសំដៅ គួរឱ្យគោរពស្រលាញ់។

តាមរយៈការបង្ហាញជីវិតឯកជនរបស់ក្រុមគ្រួសារតារាចម្រៀងល្បីឈ្មោះ ជិត ៣ទសវត្សរ៍នេះ ជាបន្តបន្ទាប់មានមតិជាច្រើនបានលើកសរសើរថា លោក ព្រាប សុវត្ថិ ជាមេគ្រួសារម្នាក់ដែលអាចចាត់ទុកជាគំរូបាន ក៏ព្រោះតែតែងផ្តល់សុភមង្គលដល់ក្រុមគ្រួសារ។ ពិសេសតាមរយៈសុវជីធម៌ និងសីលធម៌ ដែលកូនៗរបស់លោក តែងធ្វើនៅក្នុងសង្គម ជាការឆ្លុះបញ្ចាំងយ៉ាងជាក់ស្តែងមួយ ពីគុណតម្លៃនៃភាពជាគំរូរបស់លោកឪពុកនិងអ្នកម្តាយ។ តួយ៉ាងអ្វីដែលមហាជនបានដឹងពីក្រុមគ្រួសារតារាចម្រៀងរូបនេះ គឺពាក្យពីរោះភាសាក្នុងការណែនាំដល់កូនៗ។

ដោយមើលឃើញពីចំណុចពិសេស និងក្តីសុខសុមង្គលនៃក្រុមគ្រួសារ តារាជួរមុខ Galaxy Navatra រូបនេះ អ្នកគាំទ្រម្នាក់បានបញ្ចេញមតិថា «គ្រួសារខ្ញុំ យកគ្រួសារបង ជាគំរូ ទាំងកាយវិការ ទាំងការនិយាយស្តី»។

គួររំលឭកថា តារាចម្រៀងល្បីឈ្មោះ លោក ព្រាប សុវត្ថិ ត្រូវបានព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា បានចេញព្រះរាជក្រឹត្យត្រាស់បង្គាប់ផ្ដល់គោរមងារជា «ឧកញ៉ា» កាលពីថ្ងៃទី ២៩ ខែមេសា ឆ្នាំ២០២២ និងប្រកាសជាសាធារណៈនៅថ្ងៃបន្ទាប់។

ក្រៅពីអាជីពជាតារាចម្រៀងប្រចាំផលិតកម្ម Galaxy Navatra ឧកញ៉ា ព្រាប សុវត្ថិ ក៏មានការងារ និងមុខជំនួញជាច្រើនក្នុងដៃ ដូចជា ហាងកាត់សក់ ព្រាប សុវត្ថិ; ផ្ទះព្រាប សុវត្ថិ (លក់បាយម្ហូប បុកល្ហុង និងនំបញ្ចុក); គម្រោងដីឡូតិ៍ និង បុរី  ព្រាប សុវត្ថិ  ដែលមានដីជាច្រើន ហិតតា និងជាម្ចាស់ Brand សាប៊ូកក់សក់ ព្រាប សុវត្ថិ ជាដើម។ ម៉្យាងវិញទៀត តារាចម្រៀងជើងចាស់រូបនេះ ក៏ជាអ្នកតំណាងផលិតផលទូរស័ព្ទដៃ; ជាទូតសុឆន្ទៈរបស់ក្រុមហ៊ុនរថយន្ត និង ធនាគារ; ជាទូតសុឆន្ទៈគម្រោងខុនដូ និងលំនៅឋានប្រណិត ហើយរួមមានទាំងការងារជាមួយក្រុមហ៊ុនផ្សេងៗជាច្រើនទៀត។

បើទោះបីលោកជាបុគ្គលម្នាក់ដែលមានទ្រព្យធន និងល្បីឈ្មោះបោះសំឡេងពេញផ្ទៃប្រទេសក៏ដោយ តែលោកតែងប្រើប្រាស់ជីវិតសាមញ្ញតាមទម្លាប់ ធ្វើជាតៃកុងខ្លួនឯងឆ្លៀតផ្តល់ក្តីសុខដល់ក្រុមគ្រួសារខ្លួន តាមតំបន់រមណីយដ្ឋាននានាក្នុងប្រទេស។ ជាងនេះទៅទៀត រាល់ដំណើរកម្សាន្តរបស់គ្រួសារនេះទៅដល់ទីណា គឺតែងមានសកម្មភាពសប្បុរសជាញឹកញាប់ផ្សារភ្ជាប់ជាមួយផងដែរ៕