(បរទេស)៖ Apple ត្រូវបានគេដឹងថា បាននិងកំពុងតែសំងំផលិតនូវ iPhone ជំនាន់ថ្មី ដែលនឹងផ្ដល់នូវអារម្មណ៍រំភើប និងអស្ចារ្យដល់អតិថិជនរបស់ខ្លួនសម្រាប់ឆ្នាំ២០២៥នេះ ដោយ iPhone 17 ឬ iPhone 2025 នឹងបំពាក់នូវបច្ចេកវិទ្យាទំនើបចុងក្រោយ និងការរចនាឡើងជាមួយរូបរាងថ្មីប្លែក។
យោងតាមប្រភពព័ត៌មានចចាមអារ៉ាមចុងក្រោយបានបង្ហើបឱ្យដឹងថា Apple អាចនឹងត្រៀមបង្ហាញវត្តមាន iPhone ជំនាន់ថ្មីរហូតដល់ទៅ ៥ម៉ូដែលសម្រាប់ឆ្នាំ២០២៥នេះ ដោយក្នុងនោះមានស៊េរី iPhone 17 និង iPhone SE ជំនាន់ទី៤ ហើយខាងក្រោមនេះគឺជាព័ត៌មានមួយចំនួនដែលទាក់ទងនឹង iPhone ទាំង ៥ម៉ូដែលនោះ។
១) iPhone 17៖ វាត្រូវបានគេរំពឹងថានឹងនៅរក្សាទម្រង់ដដែលនៃ iPhone ប៉ុន្តែវាត្រូវបានបំពាក់មកជាមួយនឹងសមត្ថភាពអស្ចារ្យដូចជា ប្រើប្រាស់ A19 Chip ជំនាន់ចុងក្រោយរបស់ Apple ដែលផ្ដល់នូវដំណើរការលឿនជាងមុន និងបង្កើនប្រសិទ្ធភាពថាមពល។ ចំណែកមុខងារកាមេរ៉ាវិញ ត្រូវបាន Upgrade ដែលផ្ដល់នូវការថតរូបដែលមានពន្លឺតិចកាន់តែប្រសើរ និងមុខងារកម្រិតខ្ពស់ ដើម្បីបង្កើនការថតរូបឱ្យកាន់តែអស្ចារ្យ។ ចំណែកមុខងារចុងក្រោយនោះគឺ ការរចនារូបរាងថ្មីរលោង និងមានជម្រើសច្រើនពណ៌ ជាពិសេសគឺពណ៌ស្រស់ស្អាតដែលទាក់ទាញអារម្មណ៍អ្នកប្រើ។
២) iPhone 17 Pro៖ សម្រាប់ម៉ូដែលមួយនេះត្រូវបានគេរំពឹងថា បាន Update នូវរូបរាង និងបច្ចេកវិទ្យាជាច្រើន រួមមាន ProMotion Display គឺការទទួលបានបទពិសោធន៍ថ្មីនៃការមើលកាន់តែរលូនសម្រាប់ការលេងហ្គេម ការ Streaming និងការប្រើប្រាស់ប្រចាំថ្ងៃ។ ចំណែក មុខងារ កាមេរ៉ាវិញ ត្រូវបានធ្វើឱ្យល្អប្រសើរឡើងសម្រាប់ការថតជាទម្រង់ Telephoto និង Ultra-wide ហើយអ្វីដែលកាន់តែអស្ចារ្យនោះគឺអាយុកាលនៃ ការប្រើប្រាស់ថ្មដែលប្រសើរឡើង ដែល Apple បានរចនាឡើងឱ្យប្រើប្រាស់បានយូរជាងមុន សាកថ្មតែមួយម្ដង អាចប្រើបានច្រើនដង។
៣) iPhone 17 Pro Max៖ ត្រូវបានគេរំពឹងថា មានគោលបំណងផ្តល់នូវបទពិសោធន៍ស្មាតហ្វូនដ៏ប្រណិត និងសំបូរបែបបំផុត ដែលផ្ដល់ជូនដោយ Apple ។ លក្ខណៈពិសេសរំពឹងទុករួមមាន អេក្រង់ OLED Display ធំជាងមុន ស្ដើងជាងមុន ជាមួយនឹងភាពច្បាស់ និងពណ៌រស់រវើក។ បង្កើនមុខងារនៃការថតវីដេអូទម្រង់ ProRAW និង ProRes ក្នុងកម្រិតខ្ពស់ និងល្អឥតខ្ចោះជាមួយនឹងគំនិតច្នៃប្រឌិតជាងមុន។ Apple ក៏មិនភ្លេចឡើងនូវការបង្កើនគុណភាពកម្រិតផ្ទុក និងរក្សាថាមពលថ្មឱ្យនៅបានយូរសម្រាប់ម៉ូដែលមួយនេះ ដោយគឺមិនសាកញឹកញ៉ាប់។
៤) iPhone 17 Air៖ ត្រូវបានគេដឹងថា រចនាឡើងក្នុងទម្រង់ស្ដើង ស្រាល និងថ្មី។ មានន័យថា វាត្រូវបាន Apple រចនាឡើងក្នុងទម្រង់រូបរាង iPhone ថ្មី ដែលសាកស័ក្តិនឹងឈ្មោះគឺស្ដើង ស្រាល ងាយស្រួលយកតាមខ្លួន ប៉ុន្តែពោរពេញដោយសមត្ថភាព និងដំណើរការលឿនព្រោះវាបំពាក់នូវឈីប A19។
៥) iPhone SE 4៖ សម្រាប់ iPhone SE 4 ត្រូវបានពាក្យចចាមអារ៉ាមចុងក្រោយបង្ហើបឱ្យដឹងថា Apple គ្រោងនឹងប្ដូរឈ្មោះទៅជា iPhone 16e វិញ។ វាអាចនឹងមិនសូវជាខុសពី iPhone SE ម៉ូដែលមុនៗនេះទេ ប៉ុន្តែសម្រាប់អេក្រង់វិញគឺត្រូវបានគេរំពឹងថានឹងមានសោភ័ណភាពទំនើបជាមួយនឹងរូបភាពរស់រវើក។ ដំណើរការលឿនមិនចាស់ម៉ូដែល iPhone 16 នោះទេ ដោយសារតែវាក៏បំពាក់នូវឈីប A18។
សរុបសេចក្ដីមក ត្រកូល iPhone ឆ្នាំ ២០២៥ របស់ Apple បង្ហាញពីការជំរុញយ៉ាងច្បាស់លាស់ឆ្ពោះទៅរកការច្នៃប្រឌិត ដោយផ្តល់ជូននូវអ្វីមួយសម្រាប់មនុស្សគ្រប់គ្នា—ពីអ្នកប្រើប្រាស់ធម្មតា រហូតដល់អ្នកដែលចូលចិត្តបច្ចេកវិទ្យា។ ជាមួយនឹងការបន្ថែមថ្មីដ៏គួរឱ្យរំភើបដូចជា iPhone Air ស្រាលខ្លាំង និង SE ដែលត្រូវបាន Apple ធ្វើឡើងថ្មី ដើម្បីបន្តកំណត់ទីផ្សារស្មាតហ្វូនកម្រិតមធ្យមឡើងវិញ៕
