(ឡុងដ៍)៖ West Ham United បានកំពុងពិចារណា ក្នុងការដកតួនាទីគ្រូបង្វឹកបច្ចុប្បន្ន លោក Julen Lopetegui និងរំពឹងថា តែងតាំងលោក Graham Potter ជំនួសវិញផងដែរ។

ពីគេហទំព័រកីឡា BBC បានចេញផ្សាយនៅថ្ងៃនេះថា ក្លិបញញួរធំមួយនេះបានកំពុងពិភាក្សាគ្នា ក្នុងការដកតំណែងបុរសសញ្ជាតិអេស្ប៉ាញ Lopetegui ដោយផ្តើមពិភាក្សាជាមួយលោក Potter ក្នុងការមកជំនួសកន្លែងនេះដែរ។

ថ្មីៗនេះ ប្រភពពីញញួរធំបានបដិសេធពីការដកតួនាទីលោក Lopetegui ប៉ុន្តែពួកគេបានទទួលស្គាល់ថា អតីតគ្រូបង្វឹកក្លិប Real Madrid និងជម្រើសជាតិអេស្ប៉ាញខាងលើបានកំពុងស្ថិតក្រោមសម្ពាធដ៏ធំ ក្រោយពេលធ្វើពុំបានល្អនារដូវកាលនេះ។

មែនទែនទៅបុរសវ័យ ៥៨ឆ្នាំ Lopetegui ប្រឈមទៅនឹងបញ្ចប់តួនាទីកាលពីខែមុន តាំងពីប្រកួតក្នុងដីទល់នឹង Wolves តែសំណាងល្អពួកគេបានឈ្នះ និងរក្សាបានលេង ៤ប្រកួតមិនចាញ់ ដែលជាស្ថិតិល្អមួយប្រចាំរដូវកាលឆ្នាំ២០២៤-២៥។

លោក Julen Lopetegui ដែលត្រូវបានតែងតាំងជាគ្រូបង្វឹក West Ham កាលខែឧសភា ឆ្នាំ២០២៤ បានដឹកនាំក្រុមញញួរធំមួយនេះលេងចាញ់ Liverpool ៥-០ ក្នុងដី ក្រោយពេលរងបរាជ័យ ៤-១ នៅក្នុងផ្ទះមេឃខៀវ Manchester City ក្នុងលីគ Premier League ដែលញាំងឱ្យពួកគេធ្លាក់ដល់លេខរៀងទី១៤ បណ្តោះអាសន្ន នៅក្រៅតំបន់កាត់ចោលតែ ៧ពិន្ទុប៉ុណ្ណោះ៕