(អីតាលី)៖ ក្លិប AC Milan បានក្លាយជាម្ចាស់ជើងឯកពានរង្វាន់ Italian Super Cup 2024 ក្រោយពីបានយកឈ្នះក្រុមរួមទីក្រុង Inter Milan ៣-២ ក្នុងវគ្គផ្តាច់ព្រ័ត្រ ហើយបានក្លាយជាការឈ្នះពាននេះជាលើកទី៨ របស់ពួកគេផងដែរ ក្នុងនាមជាក្រុមឈ្នះពានដំបូងគេនៅឆ្នាំ១៩៨៨ ។

ស្ថិតក្នុងការប្រកួតដែលនាំឱ្យក្រុម AC Milan ឈានទៅលើកពាន គឺដោយសារកីឡាករ Abraham បានស៊ុតគ្រាប់បាល់ជ័យជម្នះនៅនាទី៩០+៣ បន្ទាប់ពីមិត្តរួមក្រុម Hernandez និង Pulisic បានស៊ុតវាយបកតាមស្មើ ២-២ ក្រោយពេល Inter Milan បើកការនាំមុន ២គ្រាប់មុនចុងវគ្គទី១ ។

សូមជម្រាបផងថា សម្រាប់ក្រុមដែលមានសិទ្ធលេងដណ្តើមពាន Italian Super Cup គឺជ្រើសយកក្រុមជើងឯក និងរងជើងឯកលីគ Serie A រួមជាមួយក្រុមដែលឈ្នះពាន Coppa Italia និងជើងឯករង ចាប់មកលេងវគ្គ ៤ក្រុមតែមង្ត ខណៈដែលពាននេះ ក្រុមសេះបង្កង Juventus ឈ្នះបាន ៩លើកច្រើនជាងគេ បន្ទាប់មកក្រុម Inter Milan និង AC Milan យកបាន ៨លើកដូចគ្នា ៕