(ប​រទេស)៖ ក្រុមហ៊ុនបច្ចេកវិទ្យាយក្ស Amazon បាននិយាយនៅថ្ងៃអង្គារសប្តាហ៍នេះថា អាជីវកម្មមួយក្នុងដៃរបស់ខ្លួនគឺ Amazon Web Services (AWS) គ្រោងនឹងវិនិយោគប្រមាណ ១១ពាន់លានដុល្លារដើម្បីពង្រីកហេដ្ឋារចនាសម្ព័ន្ធរបស់ខ្លួននៅក្នុងរដ្ឋ Georgia ដើម្បីគាំទ្រដល់ cloud computing និងបច្ចេកវិទ្យា AI។ ការវិនិយោគនេះ គឺធ្វើឡើងស្របពេលដែលក្រុមហ៊ុនបច្ចេកវិទ្យាយក្សជាច្រើនផ្សេងទៀតក៏កំពុងសម្រុកចាយទុនលើវិស័យនេះផងដែល ដូចទៅនឹង Microsoft ជាដើម ដោយពេលថ្មីៗនេះទើបប្រកាសវិនិយោគ ៨០ពាន់លានដុល្លារក្នុងឆ្នាំនេះ។។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០៨ ខែមករា ឆ្នាំ២០២៥។

Amazon បានបន្ថែមទៀតថា «ការវិនិយោគលើកនេះមាននៅក្នុងស្រុក Butts និង Douglas ត្រូវបានគេរំពឹងថា នឹងបង្កើតការងារយ៉ាងហោចណាស់​ ៥៥០ និងលើកកម្ពស់តំណែងរបស់ Georgia ជាមជ្ឈមណ្ឌលសម្រាប់ការច្នៃប្រឌិតឌីជីថលដ៏ទំនើប»។ ការកើនឡើងនៃ AI និង cloud computing នេះបានជំរុញឱ្យមានការកើនឡើងយ៉ាងខ្លាំងនៃការប្រើប្រាស់អគ្គិសនីរបស់សហរដ្ឋអាមេរិក ដោយសារមជ្ឈមណ្ឌលទិន្នន័យ AI ប្រើប្រាស់ថាមពលយ៉ាងច្រើន។ ទន្ទឹមនឹងនេះ ​ការវិភាគរបស់វិទ្យាស្ថានស្រាវជ្រាវថាមពលអគ្គិសនីក្នុងខែឧសភា បាននិយាយថា មជ្ឈមណ្ឌលទិន្នន័យអាចប្រើប្រាស់បានរហូតដល់ ៩% នៃថាមពលអគ្គិសនីសរុបដែលបានបង្កើតនៅសហរដ្ឋអាមេរិកនៅចុងទសវត្សរ៍នេះ អាស្រ័យលើអត្រាទទួលយក AI និងបច្ចេកវិទ្យា។

គួរជម្រាបថា Amazon បានធានាកិច្ចព្រមព្រៀងជាច្រើនជាមួយឧបករណ៍ប្រើប្រាស់របស់សហរដ្ឋអាមេរិកដើម្បីផ្គត់ផ្គង់ថាមពលដល់មជ្ឈមណ្ឌលទិន្នន័យរបស់ខ្លួនទូទាំងប្រទេស រួមទាំងភាពជាដៃគូជាមួយ Talen Energy នៅ Pennsylvania និង Entergy នៅ Mississippi៕