(រីយ៉ាដ)៖ FC Barcelona បានឡើងទៅចាំមុនវគ្គផ្តាច់ព្រ័ត្រពានរង្វាន់បើករដូវកាលលីគអេស្ប៉ាញ Spanish Super Cup 2025 ដោយត្រូវប៉ះ Real Madrid ឬក៏ Mallorca ក្រោយទម្លាក់គូប្រជែង Athletic Bilbao ២-០ នាយប់មិញនេះ នៅប្រទេសអារ៉ាប៊ីសាអូឌីត។

ការប្រកួតដែលត្រូវបានធ្វើឡើងនៅកីឡដ្ឋាន King Abdullah Sports City ស្ថិតក្នុងទីក្រុង Riyadh នោះ កីឡាករ Lamine Yamal និង Gavi បានរួមចំណែករកបានម្នាក់ ១គ្រាប់ពីក្នុងវគ្គពាក់កណ្តាលផ្តាច់ព្រ័ត្រ ក្នុងការយកបានជ័យជម្នះទាំង ២លើកនៅដើមឆ្នាំ២០២៥។

ក្នុងប្រកួតដែលមានតែ ៤ក្រុមមកពីអេស្ប៉ាញនេះដែរ ក្រុមរបស់លោក Hansi Flick ក៏មិនមានឈ្មោះកីឡាករ Dani Olmo និង Pau Victor ក្នុងក្រុមទេ ដ្បិត Barcelona បានទទួលការអនុញ្ញាតជាពិសេស ក្នុងការចុះឈ្មោះកីឡាករទាំង ២រូបលេងជើងទី២ រដូវកាលនេះ ពីក្រុមប្រឹក្សាកីឡាជាតិអេស្ប៉ាញ ហៅកាត់ថា CSD នាព្រឹកថ្ងៃពុធរួចមក។

កីឡាករទាំង ២រូបនោះ ទើបតែត្រូវបានក្រុមអ្នកមានបុណ្យទិញចូលនារដូវក្តៅមុន និងបានចុះបញ្ជីលេងបានតែពាក់កណ្តាលរដូវកាលប៉ុណ្ណោះ ក៏ព្រោះ Barcelona កំពុងស្ថិតក្រោមបម្រាមហិរញ្ញវត្ថុរបស់ La Liga៕