(ឡុងដ៍)៖ ក្លិបបាល់ទាត់ញញួរធំ West Ham United បានប្រកាសតែងតាំងលោក Graham Potter ជាអ្នកចាត់ការទូទៅរបស់ពួកគេនៅរសៀលថ្ងៃព្រហស្បតិ៍ ទី០៩ ខែមករានេះ ដោយមានកិច្ចសន្យាដឹកនាំ ២ឆ្នាំកន្លះ។ នេះបើយោងតាមការចេញផ្សាយដោយ BBC ថ្ងៃនេះ។

បុរសវ័យ ៤៩ឆ្នាំរូបនេះ ត្រូវបានតែងតាំងដឹកនាំ West Ham ជំនួសតំណែងគ្រូបង្វឹកចាស់សញ្ជាតិអេស្ប៉ាញ Julen Lopetegui ដែលត្រូវបានដកតំណែងកាលពីថ្ងៃពុធម្សិលមិញ ដ្បិតកាន់តួនាទីធំនេះបានតែ ៦ខែប៉ុណ្ណោះតពីលោក David Moyes។

លោក Potter ចូលដឹកនាំញញួរធំ ស្របពេលពួកគេកំពុងស្ថិតនៅលេខរៀងទី១៤ ក្នុងលីគ Premier League ដោយនៅក្រៅតំបន់កាត់ចោលតែ ៧ពិន្ទុប៉ុណ្ណោះ និងទើបតែលេងឈ្នះ ៦ប្រកួតទេនារដូវកាលឆ្នាំ២០២៤-២៥។

នេះជាការគ្រូបង្វឹកលើកដំបូងរបស់លោក Potter ក្រោយពេលតោខៀវ Chelsea ដកតំណែងកាលពីខែមេសា ឆ្នាំ២០២៣ មក។ West Ham ត្រូវធ្វើដំណើរទៅប៉ះម្ចាស់ផ្ទះ Aston Villa នៅរាត្រីថ្ងៃសុក្រសប្តាហ៍នេះ សម្រាប់ជុំទី៣ នៃពានរង្វាន់លំដាប់ទី២ អង់គ្លេស FA Cup ដែលជា ១ប្រកួតក្នុងការដឹកនាំរបស់លោក Potter អតីតគ្រូបង្វឹក Brighton៕