(ភ្នំពេញ)៖ បន្ទាប់ពីបានប្រើពេលផលិត និងកាត់តរហូតលេចចេញជារូបរាង អស់រយៈពេលជាង២ឆ្នាំកន្លងមកនេះ, ខ្សែភាពយន្តខ្នាតធំរឿង «រង់ចាំ» ជាប្រភេទរឿងបែបភ័យរន្ធត់ ព្រឺព្រួច ចងអាឃាត សម្លាប់មិនញញើតដៃនោះ បានធ្វើពិធីបើកសម្ពោធប្រកាសដាក់បញ្ចាំងជាផ្លូវការ កាលពីល្ងាចថ្ងៃទី១៣ ខែមករា ឆ្នាំ២០២៥ ម្សិលមិញនេះ ខណៈដែលផលិតករនៃភាពយន្តលោក ព្រីកា បានអះអាងថា ប្រាក់ចំណេញបានមកពីការលក់សំបុត្រចូលរទស្សនា ភាពយន្តរឿង «រង់ចាំ» នឹងធ្វើការបរិច្ចាគជូនដល់មណ្ឌលកុមារកំព្រាមួយកន្លែង ដែលជាកិច្ចការងារសប្បុរសធម៌របស់ផលិតកម្ម ក្នុងការចូលរួមជួយដល់សង្គមជាតិ។
លោក ព្រីកា អ្នកនិពន្ធ និងជាអ្នកដឹកនាំសម្តែងរឿង «រង់ចាំ» បានលើកឡើងថា ទំរាំថតរឿងមួយនេះចប់ គឺត្រូវចំណាយរយៈពេលជាង ២ឆ្នាំ ដោយសារតែកត្តាជួបឧបសគ្គលំបាកច្រើនក្នុងអំឡុងពេលថត។ ក្នុងរឿងនេះក្រៅពីតារាសម្តែង លោកក៏បានអញ្ជើញលោកគ្រូ សាក់យ័ន្ត និងពូកែខាងមន្តអាគមមកពីកម្ពុជាក្រោម ចូលរួមសម្តែងដែលធ្វើឲ្យភាពយន្តមួយនេះកាន់តែល្អមើលខ្លាំង។ ក្នុងភាពយន្តនេះ បង្ហាញពីឃាតកម្ម និងអំពើចងអាឃាត ដែលរំលេចដោយឈុតឆាករន្ធត់ៗ ស្ទើរគាំងបេះដូង ដែលអ្នកចូលចិត្តមើលរឿងព្រឺព្រួច អាចចូលទស្សនា និងវាយតម្លៃខ្ពស់ ចំពោះគុណភាពនៃសាច់រឿងនេះបាន។
ជាមួយគ្នានេះលោក ព្រីកា បានប្រកាថា សម្រាប់ប្រាប់ចំណេញពីការលក់សំបុត្រចូលទស្សនា គឺត្រូវយកទៅបរិច្ចាគជូនមណ្ឌលកុមារកំព្រាមួយកន្លែង ដោយសារតែលោក គឺជាអតីតក្មេងរស់នៅក្នុងមណ្ឌលនេះផង ទើបពេលនេះលោកមានសមត្ថភាព និងមានឱកាសស្វែងរកថវិកាតាមរយៈភាពយន្តមួយនេះ ដើម្បីជួយដល់មណ្ឌលវិញ ហើយនេះអាចចាត់ទុកថា គឺជាសកម្មភាពមួយដ៏ល្អកម្រមានផងដែរ។ ហ្វេនៗ ក៏ដូចជាអ្នកគាំទ្រ ដែលបានទិញសំបុត្រចូលទស្សនារឿង «រង់ចាំ» គឺប្រៀបបានដូចជាបរិច្ចាគថវិកាជួយដល់ក្មេងកំព្រា ដែលកំពុងខ្វះខាតអ៉ីចឹងដែរ។
ភាពយន្តរឿង «រង់ចាំ» របស់ផលិតកម្ម ផាតនើរភីកធឺ ដែលបានប្រកាសដាក់សម្ពោធជាផ្លូវការ កាលពីថ្ងៃទី១៣ ខែមករា ឆ្នាំ២០២៥នេះ ក្រោមវត្តមានសិល្បករ-សិល្បការិនី, តារា Tik Tok និង Influencer ជាច្រើនចូលរួមផងនោះ កំពុងតែក្លាយជារឿងភ័យរន្ធត់ ព្រឺព្រួច ចងអាឃាត សម្លាប់មិនញញើតដៃ និងមានសាច់រឿងជក់ចិត្តយ៉ាងខ្លាំង ហើយក៏ជាតម្រូវការដែលអ្នកចូលចិត្តរឿងរន្ធត់ៗ មិនគួរមើលរំលង។ ភាពយន្តខ្នាតធំមួយនេះ មិនត្រឹមតែបង្ហាញភាពភ័យខ្លាច និងភ័យរន្ធត់នោះទេ ពោលក៏បានបង្ហាញនូវយ័ន្តខ្មែរ បាលី មន្តអាគមអូមអាមរបស់ដូនតាខ្មែរយើងផងដែរ។
សូមបញ្ជាក់ថា ភាពយន្តរឿង «រង់ចាំ» នឹងប្រកាសលក់សំបុត្រចាប់ពីថ្ងៃទី១៦ ខែមករា ឆ្នាំ២០២៥នេះតទៅ គ្រប់រោងភាពយន្តទាំងអស់ ដោយគេជឿជាក់ថា មួយរឿងនេះពិតជាទទួលបានជោគជ័យ ដោយសារតែរឿង «រង់ចាំ» មិនត្រឹមតែល្អមើលទេ តែបើនិយាយពីគុណភាពនៃការកាត់តភាពយន្ត គឺល្អតែម្ដង ហើយបានបង្កប់នូវខ្លឹមសារអប់រំ ត្រូវជាមួយនឹងបរិបទសង្គមសព្វថ្ងៃ៕
