(បាសេឡូណា)៖ FC Barcelona បានរួមដំណើរជាមួយក្រុមកំពូលតារាងលីគ La Liga គឺ Atletico Madrid ឡើងទៅកាន់វគ្គ ៨ក្រុមពានលំដាប់ទី២ អេស្ប៉ាញ Copa del Rey 2024-25 ក្រោយទម្លាក់គូប្រជែង Real Betis យ៉ាងចាស់ដៃយប់មិញ។

ពីការប្រកួតវគ្គ ១៦ក្រុម ម្ចាស់ផ្ទះ Barcelona បានគាបសង្កត់ក្រុមភ្ញៀវ Betis សមាជិកលេងនៅ La Liga មិនឱ្យតដៃរួចឡើយ តាមរយៈរកបាន ៥គ្រាប់នាំមុខតែម្តង ពីការរកបានរបស់កីឡាករផ្សេងៗគ្នាផងដែររួមមាន Gavi, Kounde, Raphinha, Torres និង Yamal ជាដើម មុនពេល Betis រកបានតែ ១គ្រាប់ចុងម៉ោង មុនហាលអាវ។

នេះក៏ជាជ័យជម្នះលើកទី២ ជាប់ៗគ្នាផងដែររបស់ក្រុមលោក Hansi Flick ក្រោយពេលពួកគេបានវាយបកឈ្នះក្រុមការពារជើងឯក Real Madrid ៥-២ ដើម្បីលើកពាន Spanish Super Cup កាលពីរាត្រីថ្ងៃអាទិត្យ នៅមជ្ឈិមបូព៌ា។

ក្រៅពី Barca និង Atletico Madrid ក៏នៅមានក្រុម Leganes, Valencia និង Getafe ក៏ទទួលបានកៅអីម្នាក់១ ដើម្បីឡើងទៅឈរចាំមុនវគ្គ ១/៤ ជាបន្តទៀតដូចគ្នា ដោយរង់ចាំ ៣ក្រុមទៀតដែលប្រកួតរាត្រីនេះ៕