(ឡុងដ៏)៖ ខ្សែប្រយុទ្ធ Erling Haaland ការសម្រេចបន្តកិច្ចសន្យាថ្មីជាមួយក្លិប Manchester City នៅរយៈពេល ១០ឆ្នាំបន្ថែម បាននាំឱ្យរូបគេរួមរស់ជាមួយក្លិបមេឃខៀវរហូតដល់ឆ្នាំ២០៣៤ ក្នុងលីគអង់គ្លេសនោះ នឹងក្លាយជានាំឱ្យខ្សែប្រយុទ្ធន័រវេលរូបនេះមានឱកាលស្វែងរកការកសាងកេរ្តិ៍ឈ្មោះ ជាមួយក្លិបបន្ថែម និងការបំបែកកំណត់ត្រាអតីតកីឡាករឆ្នើមៗ ប្រចាំលីគ ។

រំលឹកផងថា Erling Haaland បានចូលមកកាន់ក្លិបជើងឯកលីគអង់គ្លេស Man City កាលឆ្នាំ២០២២ ក្រោយការដឹកនាំរបស់លោក Pep Guardiola ដែលមកដល់ពេលនេះរូបគេលេងបាន ១២៦ប្រកួតរកបាន ១១១គ្រាប់ហើយ ដ្បិតកិច្ចសន្យាចាស់នឹងផុតកំណត់នៅឆ្នាំ២០២៧ ។

គិតត្រឹមការចាប់ផ្តើមលេងជាមួយ Man City ខ្សែប្រយុទ្ធវ័យក្មេងកម្ពស់ខ្ពស់ Erling Haaland ឈ្នះបានពាន Premier League ២លើក, ពានរង្វាន់ FA Cup, FA Community Shield, ពានលីគអឺរ៉ុប UEFA Champions League, UEFA Super Cup និងឈ្នះពានស្បែកជើងមាសនៅលីគអង់គ្លេសចំនួន ២រដូវកាលផងដែរ

ហើយរូបគេក៏ត្រូវបានកំណត់ថា នឹងអាចបំបែកកំណត់ត្រារបស់លោក Alan Shearer ក្នុងលីគអង់គ្លេស នៅចំនួន ២៦០គ្រាប់ ដែលគិតត្រឹម ៨៧ប្រកួតមកនេះ Haaland រកបាន ៧៩គ្រាប់ទៅហើយ ៕