(មេនឆេស្ទើ)៖ ក្រុមជើងឯកលីគអង់គ្លេស Manchester City ទិញបានខ្សែការពារ Vitor Reis របស់ Palmeiras ក្នុងតម្លៃ ២៩.៦លានផោន នៅថ្ងៃអង្គារ ទី២១ ខែមករា ឆ្នាំ២០២៥។

ពីគេហទំព័រកីឡា BBC បានចេញផ្សាយថា យុវជនវ័យទើបតែ ១៩ឆ្នាំរូបនេះ បានព្រមព្រៀងចុះកិច្ចសន្យាលេងនៅ Etihad រយៈពេល ៤ឆ្នាំកន្លះ ដ្បិតកន្លងមក Reis ក៏ធ្លាប់បង្ហាញខ្លួនក្នុងឈុត U17 ប្រេស៊ីលបានចំនួន ៩លើកមកដែរ។

Reis ដែលជំនាញជើងស្តាំ លេងក្នុងតំបន់ការពារកណ្តាលនោះ បានបង្ហាញខ្លួនក្នុងឈុតធំរបស់ Pameiras លេងក្នុងលីគកំពូលប្រេស៊ីលបាន ២២លើកផងដែរ មុនពេលចាកចេញមកទឹកដីអឺរ៉ុប ក្នុងក្លិបមេឃខៀវ Manchester City ដោយរំពឹងបានលេងជុំគ្នាជាមួយអ្នកចាំទី Ederson ដែលមកពីសាំបាដូចគ្នា។

Vitor Reis ជាសមាជិកថ្មីទី២ ដែល City បាននាំចូលនាខែមករា ឆ្នាំ២០២៥ នេះ ក្រោយការមកដល់របស់សិស្សច្បង ១ឆ្នាំគឺ Abdukodir Khusanov មកពីក្លិប Lens របស់បារាំង ក្នុងតម្លៃជាង ៤០លានដុល្លារ៕