(បរទេស)៖ ក្រុមហ៊ុនហ្វាំងឡង់ Nokia បាននិយាយនៅថ្ងៃចន្ទសប្តាហ៍នេះថា លោក Pekka Lundmark នឹងលាលែងពីតំណែងជានាយកប្រតិបត្តិ (CEO) ហើយលោក Justin Hotard នឹងត្រូវបានតែងតាំងជា CEO ថ្មីរបស់ Nokia បន្ត ចាប់ពីថ្ងៃទី០១ ខែមេសា ឆ្នាំ២០២៥​ ខាងមុខនេះតទៅ។ បច្ចុប្បន្ន Hotard គឺជាអនុប្រធានប្រតិបត្តិ និងជាអ្នកគ្រប់គ្រងទូទៅនៃមជ្ឈមណ្ឌលទិន្នន័យ និង AI Group របស់ Intel ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១០ ខែកុម្ភៈ ឆ្នាំ២០២៥។

Nokia ដែលជាក្រុមហ៊ុនផលិតឧបករណ៍ទូរគមនាគមន៍ នឹងកំពុងតស៊ូជាមួយនឹងការលក់ឧបករណ៍ 5G ទាប បាននិងកំពុងស្វែងរកមធ្យោបាយដើម្បីធ្វើពិពិធកម្មទីផ្សាររបស់ពួកគេ និងបំបែកចូលទៅក្នុងផ្នែកដែលកំពុងរីកចម្រើនដូចជា បញ្ញាសិប្បនិម្មិត AI។ ប្រធានក្រុមប្រឹក្សាភិបាលរបស់ Nokia លោក Sari Baldauf បាននិយាយនៅក្នុងសេចក្តីថ្លែងការណ៍មួយថា «Hotard មានកំណត់ត្រាដ៏រឹងមាំនៃការបង្កើនល្បឿននៃកំណើននៅក្នុងក្រុមហ៊ុនបច្ចេកវិទ្យា និងជំនាញរបស់គាត់នៅក្នុងទីផ្សារ AI និងមជ្ឈមណ្ឌលទិន្នន័យ ដែលមានសារៈសំខាន់សម្រាប់ការរីកចម្រើននាពេលអនាគតរបស់ Nokia»។

ជាមួយនឹងបទពិសោធន៍ ២៥ឆ្នាំនៅក្នុងវិស័យបច្ចេកវិទ្យា នឹងតួនាទីជាអ្នកដឹកនាំលោក Hotard ត្រូវបានគេឱ្យដឹងថា ពីមុនលោកបម្រើការងារនៅក្រុមហ៊ុន Hewlett Packard Enterprise (HPE) និង NCR Corporation។ យ៉ាងមិញ មុនពេលលោកចូលរួមជាមួយ Intel ក្នុងខែមករា ឆ្នាំ២០២៤ លោក​ Hotard គឺជាអនុប្រធានប្រតិបត្តិ និងជាអ្នកគ្រប់គ្រងជាន់ខ្ពស់នៃ AI និង Labs នៅ HPE។ ខណៈឆ្នាំ ២០១៥ គាត់ជាប្រធាន NCR Small Business និងកាន់មុខតំណែងនៅ Symbol Technologies និង Motorola Inc។ Hotard ទទួលបានបរិញ្ញាបត្រវិទ្យាសាស្ត្រផ្នែកវិស្វកម្មអគ្គិសនីពីសាកលវិទ្យាល័យ Illinois នៅ Urbana-Champaign និង MBA ពីសាលា IT Sloan School of Management។

គួរជម្រាបថា Nokia បានគូសបញ្ជាក់ថា លោក Pekka Lundmark ដែលជា CEO តាំងពីឆ្នាំ២០២០ បានសម្រេចចិត្តចុះចេញពីតំណែង ប៉ុន្តែនឹងនៅតែជាទីប្រឹក្សារបស់ Hotard រហូតដល់ដំណាច់ឆ្នាំ។ ក្នុងអំឡុងពេលកាន់តំណែងរបស់ Lundmark ក្រុមហ៊ុន Nokia បានបង្កើតភាពជាអ្នកដឹកនាំផ្នែកបច្ចេកវិទ្យារបស់ខ្លួនឡើងវិញនៅក្នុង 5G ពង្រឹងបណ្តាញស្នូលដែលមានមូលដ្ឋានលើ Cloud និងធ្វើឱ្យប្រសើរឡើងនូវហេដ្ឋារចនាសម្ព័ន្ធបណ្តាញ និងអាជីវកម្មអាជ្ញាប័ណ្ណប៉ាតង់៕