(ភ្នំពេញ)៖ គណៈកម្មាធិការជាតិអូឡាំពិកកម្ពុជា(NOCC) បានគាំទ្ររាល់ការរៀបចំព្រឹត្តិការណ៍កីឡារត់គ្រប់កម្រិត មិនថារត់កម្សាន្ដ ឬលក្ខណៈហាជននានា ទោះមិនស្របតាមស្ដង់ដារជាតិ ឬអន្ដរជាតិក្ដី ដើម្បីលើកកម្ពស់សុខភាពសាធារណៈរបស់ប្រជាពលរដ្ឋ និងជំរុញការចូលរួមព្រឹត្តិការណ៍រត់ប្រណាំងធំៗផ្លូវការ ដូចជាទិវាររត់ប្រណាំងពាក់កណ្ដាលម៉ារ៉ាតុងអន្ដរជាតិ ទាំងនៅភ្នំពេញ និងខេត្តសៀមរាបជាដើម ។

ការគូសបញ្ជាក់នេះ ធ្វើឡើងក្នុងសន្និសីទសារព័ត៌មាន ស្ដីពីទិវារត់ប្រណាំង ស្ត្រីចម្ងាយឆ្ងាយ ១០គីឡូម៉ែត្រ (Women Run 10K) ឆ្នាំ២០២៥ នៅព្រឹកថ្ងៃទី១២ ខែកុម្ភៈនេះ ខណៈព្រឹត្តិការណ៍រត់កម្សាន្ដ ដើម្បីអបអរសាទរទិវាសិទ្ធនារីអន្ដរជាតិ ៨មីនាឆ្នាំនេះ នឹងប្រព្រឹត្តទៅ នាថ្ងៃទី៨ ខែមីនា ឆ្នាំ២០២៥ នៅសួនច្បារមុខវត្តបទុមវតី ។ កម្មវិធីប្រចាំឆ្នាំនេះ មាន ២វិញ្ញាសា រួមមានរត់ ១០គីឡូម៉ែត្រ និង ៤គីឡូម៉ែត្រ ។

លោកបន្ដថា បច្ចុប្បន្នអ្នកហាត់ប្រាណ ដោយការដើរ រត់ និងជិះកង់ជាដើម គឺមានកំណើនគួរឲ្យកត់សម្គាល់ គ្រាដែលការរៀបចំកម្មវិធីរត់កម្សាន្ដ និងសុខភាពក៏កើនឡើងច្រើន ដែលស្របតាមគោលនយោបាយជាតិ ក៏ដូចជាគោលនយោបាយអាស៊ាន ដែលបានធ្វើការជំរុញការហាត់ប្រាណ និងជាការវាស់ស្ទង់មួយ ពោលគឺ សុខភាពប្រជាពលរដ្ឋល្អ សុខភាពសេដ្ឋកិច្ចក៏ល្អផងដែរ ។ ដូច្នេះលោកគាំទ្រការរៀបចំរាល់កម្មវិធីកីឡាផ្សេងៗ ពិសេសកីឡារត់ ទោះបីជាការរៀបចំមិនទាន់ស្ដង់ដារក្ដី តែលោកលើកទឹកចិត្តការរៀបចំឲ្យបានច្រើន ដើម្បីលើកកម្ពស់គុណភាពជីវិតមនុស្សម្នាក់ៗ ។

លោក វ៉ាត់ ចំរើន បន្ថែមថា «យើងលើកទឹកចិត្តការរៀបចំតាមតំបន់ផ្សេងៗ ដើម្បីបំផុតការលេងកីឡា និងការចូលរួមកាន់តែច្រើន ព្រោះបើការរៀបចំកាន់តែច្រើន នឹងជួយដល់ការរៀបចំព្រឹត្តិការណ៍កីឡាធំៗផ្លូវការកាន់តែល្អ ។ ការរៀបចំមានតាមកម្រិត ការរៀបចំតាមស្ថាប័នផ្សេងៗ មិនមែនជាការរៀបចំស្ដង់ដារកម្រិតជាតិ ឬអន្ដរជាតិ តែ NOCC តែងផ្ដោតការរៀបចំតាមនិយាមអន្ដរជាតិ ដើម្បីទទួលបាននូវការគាំទ្រ ។ នេះជាចំណុចសំខាន់មួយ ដែល NOCC អំពាវនាវឲ្យអ្នកនៅឆ្ងាយ ឬអ្នកមានលទ្ធភាពតាមស្រុកស្រែចម្ការ គាត់អាចរៀបចំរត់លេងកម្សាន្ដសប្បាយ ឬមហាជន ហើយក៏អត់មានផលប៉ះពាល់អ្វីដែរ ព្រោះវាជាចលនាសង្គម ដែលយើងត្រូវបើកសេរីភាព និងរួមគ្នាធ្វើ ដើម្បីប្រយោជន៍រួមក្នុងសង្គម ពិសេសសុខភាពសាធារណៈរបស់ប្រជាពលរដ្ឋ» ។

គួរដឹងថា ទិវារត់ប្រណាំង ស្ត្រីចម្ងាយឆ្ងាយ ១០គីឡូម៉ែត្រ ឆ្នាំ២០២៥ នាដើមខែមីនាខាងមុខ បច្ចុប្បន្នមានអ្នកចុះឈ្មោះចូលរួមជាង ២ពាន់នាក់ ហើយគណៈកម្មការរៀបចំ បានអំពាវនាវឲ្យមានការចូលរួមកាន់តែច្រើន និងទាន់ពេលវេលា ព្រោះការចូលរួមរបស់ប្រជាពលរដ្ឋ ក៏ដូចជាយុវជន គឺជាកត្ដាដ៏សំខាន់មួយ ដែលគាំទ្រ និងជំរុញទឹកចិត្តការរៀបចំព្រឹត្តិការណ៍នេះឲ្យបានកាន់តែមានគុណភាព និងសុវត្ថិភាពដល់អ្នករត់ទាំងអស់គ្នា ពិសេសដើម្បីអបអរសាទរទិវាសិទ្ធនារីអន្ដរជាតិ ដែលជាការលើកកម្ពស់សមភាពយេនឌ័រក្នុងសង្គមផងដែរ ៕