(បរទេស)៖ ទាំងកីឡាករស្នូកឃ័រ Mark Williams និង Mark Allen បានជ្រុះចេញពីព្រឹត្តិការណ៍ Welsh Open 2025 របស់ប្រទេសវ៉េលត្រឹមជុំទី២ ដូចគ្នា គ្រាដែលជើងខ្លាំងអង់គ្លេស Ronnie O’Sullivan មិនបានចូលរួមឡើយ។

ជើងចាស់ Williams អតីតជើងឯកពិភពលោក ៣សម័យកាល បានប្រកួតចាញ់ ៤-២ ក្រោមស្នាដៃរបស់គូប្រជែង Stephen Maguire ក្រោយពេលតាមស្មើ ២-២ ក្នុងនាមធ្លាប់ឈ្នះជើងឯក Welsh Open ចំនួន ២លើកផងដែរ។

ក៏ប៉ុន្តែកីឡាកររបស់ស្កុតឡេន Maguire បានបង្កើនការនាំមុខ ២ហ្វេមបន្ទាប់ ដើម្បីទទួលបានជ័យជម្នះឡើងទៅជុំទី៣ តែម្តង នៅឯទីលាន Venue Cymru ស្ថិតក្នុងទីក្រុង Llandudno។

ចំណែកឯកីឡាករអៀរឡង់ខាងជើង Mark Allen វិញ ក៏បានហាលអាវត្រឹមជុំទី២ នេះដែរ ក្រោមស្នាដៃរបស់កីឡាករចិន Yuan Sijun នារសៀលថ្ងៃពុធម្សិលមិញ ទោះបីជា Allen បាននាំមុខ ២-១ មុនពេលត្រូវបានជើងខ្លាំងមកពីខេត្ត Nanchang វ័យ ២៤ឆ្នាំ វាយបកយកជ័យជម្នះវិញ។

Sijun នឹងត្រូវប៉ះជើងខ្លាំងពិភពលោក ៤សម័យគឺ John Higgins សម្រាប់ជុំទី៣ ជាបន្តទៀត៕