(ភ្នំពេញ)៖ ព្រឹត្តិការណ៍បាល់ទះ «តេជោលីគ» ឆ្នាំ២០២៤/២៥ បានបញ្ចប់ការប្រកួតជុំទី២ (Top-6) និងបានរកឃើញបេក្ខភាពឡើងវគ្គពាក់កណ្ដាលផ្ដាច់ព្រ័ត្រហើយ ដោយក្រុមស្នងការដ្ឋាននគរបាលខេត្តស្វាយរៀង ត្រូវជួបក្រុមវិសាខា ខណៈក្រុមសួងមហាផ្ទៃ ត្រូវជួបក្រុមការពារតំណែងជើងឯក បញ្ជាការដ្ឋានអង្គរក្ស។

សម្រាប់ការប្រកួតវិលជុំសន្សំពិន្ទុជុំទី២ ស្នងការដ្ឋាននគរបាលខេត្តស្វាយរៀង បានឈរកំពូលតារាង ដោយរកបាន ១៣ពិន្ទុ ក្រោយឆ្លងកាត់ ៥ប្រកួត ឈ្នះ ៤ និងចាញ់ ១ គ្រាដែលក្រសួងមហាផ្ទៃ ឈរលេខ២ រកបាន ១១ពិន្ទុ ក្រោយឆ្លងកាត់ ៥ប្រកួតឈ្នះ ៤ និងចាញ់ ១ ដូចគ្នា តែចាញ់ប្រៀបចំនួនសិត (ឈ្នះ)។ រីឯបញ្ជាការដ្ឋានអង្គរក្ស ឈរលេខ៣ រកបាន ៩ពិន្ទុ ជាមួយលទ្ធផល ៥ប្រកួតឈ្នះ ៣ និងចាញ់ ២ និងវិសាខា ឈរលេខ៤ រកបាន ៦ពិន្ទុ ស្មើស្នងការដ្ឋាននគរបាលរាជធានីភ្នំពេញ តែមានប្រៀបលើចំនួនសិតឈ្នះគូប្រកួត។

តាមរយៈលទ្ធផលខាងលើ និងរូបមន្ដប្រកួតវគ្គពាក់កណ្ដាលផ្ដាច់ព្រ័ត្រ ដែលតម្រូវឲ្យប្រកួតខ្វែងគ្នា ក្រុមកំពូលតារាង ស្នងការដ្ឋាននគរបាលខេត្តស្វាយរៀង នឹងត្រូវជួបវិសាខា និងក្រុមក្រសួងមហាផ្ទៃ ត្រូវជួបបញ្ជាការដ្ឋានអង្គរក្ស នាថ្ងៃទី២២ ខែកុម្ភៈខាងមុខ ហើយក្រុមទទួលបានជ័យជម្នះ នឹងត្រូវឡើងវគ្គផ្ដាច់ព្រ័ត្រ នាថ្ងៃទី២៣ ខែកុម្ភៈ ឆ្នាំ២០២៥ នៅវិមានពហុកីឡដ្ឋានជាតិ (អូឡាំពិក)។ ចំពោះក្រុមជើងឯក នឹងទទួលបានពាន អមប្រាក់រង្វាន់ចំនួន ៦០លានរៀលផងដែរ៕