(ភ្នំពេញ)៖ លីគកំពូលកម្ពុជា ឆ្នាំ២០២៤/២៥ បានបញ្ចប់ការប្រកួតសន្សំពិន្ទុជុំទី២ ដោយក្រុមការពារតំណែងជើងឯក ព្រះខ័នរាជស្វាយរៀង បន្ដឈរកំពូលតារាង និងរក្សាការនាំមុខក្រុមភ្នំពេញក្រោន ១ពិន្ទុបណ្ដោះអាសន្ន ក្រោយបញ្ចប់ការប្រកួតសប្ដាហ៍ទី២២ មុនបន្ដការប្រកួតដំណាក់កាលទី១ សម្រាប់វគ្គ ៦ក្រុមកំពូលតារាង (TOP-6) និងក្រុមខាងក្រោមទាំង ៥ក្រុម (Bottom 5) នាចុងសប្ដាហ៍នេះ។
ព្រះខ័នរាជស្វាយរៀង និងភ្នំពេញក្រោន បានបន្ថែម ៣ពិន្ទុរៀងខ្លួន ក្នុងជំនួបចុងសប្ដាហ៍ចុងក្រោយ នៃជុំទី២ ក្នុងនោះក្រុមជើងឯកឆ្នាំចាស់ បានយកឈ្នះក្រុមភ្ញៀវសមាគមកីឡាបាល់ទាត់ក្រសួងមហាផ្ទៃ ៥-០ និងក្រុមសិង្ហក្រហម បានវាយបកយកឈ្នះក្រុមម្ចាស់ផ្ទះ ISI ដង្កោសែនជ័យ ២-១។ ជ័យជម្នះនេះ នាំឲ្យព្រះខ័នរាជស្វាយរៀង បន្ដឈរលេខ១ និងរកបាន ៥២ពិន្ទុ គ្រាដែលភ្នំពេញក្រោន ឈរលេខ២ រកបាន ៥១ពិន្ទុ។
ចំណែកក្រុមវិសាខាវិញ គឺបានយកឈ្នះក្រុមបឹងកេត ២-០ នៅពហុកីឡដ្ឋានជាតិ (អូឡាំពិក)។ ជំនួបដ៏តានតឹងនេះ វគ្គទី១ ក្រុមទាំងពីរ បានរក្សាលទ្ធផល ០-០ មុនកីឡាករ ស៊ិន សុវណ្ណមករា និង Park Jungbin រកបានម្នាក់ ១គ្រាប់ នៅនាទី៥២ និងនាទី៥៨ ហើយលទ្ធផលនេះ បានរក្សាដល់ចប់ការប្រកួត។ ប៉ុន្ដែមុនអាជ្ញាកណ្ដាលផ្លុំកញ្ចែការប្រកួតពេញម៉ោង ក៏មានការប៉ះទង្គិចគ្នាចុងម៉ោង រហូតមានការពិន័យកាតក្រហមលើកីឡាករ Ramon របស់វិសាខាផងដែរ។
យ៉ាងណាការបន្ថែម ៣ពិន្ទុនេះដែរ បានធ្វើឲ្យវិសាខា នៅតែមានសង្ឃឹមច្រើន ក្នុងការប្រជែងជើងឯក ជាមួយក្រុមព្រះខ័នរាជស្វាយរៀង និងភ្នំពេញក្រោន ដោយពួកគេរកបាន ៤៤ពិន្ទុឈរលេខ៣ ពោលគឺចាញ់ប្រៀបក្រុមកំពូលតារាង ៨ពិន្ទុ។ រីក្រុមបឹងកេត កាន់តែខើចឱកាសប្រជែងពាន ដ្បិតទើបរកបាន ៣០ពិន្ទុប៉ុណ្ណោះ ក្រោយចប់ជុំទី២ តាមពីក្រោយក្រុមណាហ្គាវើលដ៏ ដែលរកបាន ៣៦ពិន្ទុ ឈរលេខរៀងទី៥ និងអង្គរថាយហ្គឺរ ដែលរកបាន ៣៧ពិន្ទុ ឈរលេខរៀងទី៤។
សូមបញ្ជាក់ថា សម្រាប់ការប្រកួតដំណាក់កាលទី២ នឹងចាប់ផ្ដើមការប្រកួតពីថ្ងៃទី២២ ខែកុម្ភៈ ដល់ថ្ងៃទី១៨ ខែឧសភា ឆ្នាំ២០២៥ ខាងមុខ ក្នុងនោះបេក្ខភាពក្រុម TOP-6 និង Bottom 5 នឹងត្រូវធ្វើការប្រកួត ២ជុំដូចគ្នា ជាមួយការរាប់ពិន្ទុបន្ដពីការប្រកួតដំណាក់កាលទី១ (២ជុំ)។ ដូច្នេះក្រោយបញ្ចប់ការប្រកួត ២ជុំ សម្រាប់វគ្គ TOP-6 ក្រុមមានពិន្ទុខ្ពស់ជាងគេ នឹងគ្រងតំណែងជើងឯកលីគកំពូលកម្ពុជា ឆ្នាំ២០២៤/២៥ ជាផ្លូវការតែម្ដង។ ចាំមើលតើព្រះខ័នរាជស្វាយរៀង អាចរក្សាកៅអីកំពូលតារាងរហូតចប់រដូវកាលបានដែរឬទេ?
